Son illər Bakıda əhalinin artımı, yeni yaşayış massivlərinin salınması və şəhərə köç proseslərinin sürətlənməsi məktəblərdə şagird sıxlığını artırıb. Xüsusilə paytaxtın bir sıra ərazilərində məktəblərdə siniflərin normadan artıq komplektləşdirilməsi müşahidə olunur.



Gündəm24.az xəbər veirirki,təhsil eksperti Elşən Qafarov Sfera.az-a bildirib ki, Bakı Şəhər Təhsil İdarəsinin tabeliyində 350 məktəb var.



Bu 350 məktəbdə təxminən 500 000 şagird təhsil alır. Ümumiyyətlə ölkədə təhsil alan hər 3 şagirddən biri Bakı Şəhər Təhsil İdarəsinə daxil olan məktəblərdə oxuyur. Eyni zamanda çalışan hər 5 müəllimdən biri Bakı Şəhər Təhsil İdarəsinə tabe olan məktəblərdə çalışır:



“Təbii ki, Bakı şəhəri üzrə məktəblərdə vəziyyət sıxlıq baxımından ürəkaçan deyil. Siniflərində 30,35,40 hətta 50-yə qədər şagirdi olan məktəblərimiz var. Bu baxımdan Bakı şəhərində şagird sıxlığı pik həddədir. Buna baxmayaraq ötən tədris ilində dövlət Bakı şəhərində təqribən 10 məktəb tikib. Sıxlığı aradan qaldırmaq üçün tədbirlər görülür. Amma urbanizasiya nəticəsində əhalinin plansız olaraq Bakı şəhərində daha çox yerləşməsi, məktəblilər üçün yerlərin saxlanılmaması çox ciddi problemlər yaradır. Bu problemlər daha çox Bakı şəhəri və Abşeron rayonu ərazisindədir”.


Ekspert məcburi köçkünlərin Qarabağa qayıdışı, regionların sosial-iqtisadi inkişafı ilə bağlı görülən tədbirlərin gələcəkdə bu problemin həllinə bir qədər kömək edəcəyini düşünür:



“Bakı məktəbləri şagird sayını tam qarşılaya bilmir. Hazırkı vəziyyətdə Bakı şəhərində şagird sıxlığını aradan qaldırmaq üçün ən azı 200 məktəb tikilməlidir. Eyni zamanda Bakı şəhərində yerləşən məktəblər şagirdlərin sayının təqribən 50%-ni qarşılaya bilir. Belə olan halda Bakı məktəblərində sıxlıq daha çoxdur. Ümumilikdə bir məktəbdə tədrisin normal təşkil edilməsi üçün 700000 şagird olmalıdır. Amma bu normadan artıq olan məktəblərimiz var”.

Oxunub: 478