Rusiyada yaşayan azərbaycanlılar öz yaxınlarına pul göndərməkdə çətinlik çəkirlər. Belə ki, onlara Azərbaycana rubl göndərməyə icazə verilmir. Rusiya bankları yalnız dollar göndərir. Bu isə onların baha qiymətə dollar almasına və nəticədə göndərişlərin həcminin azalmasına səbəb olur.
Bəs, reallıqda Azərbaycana rubl, yoxsa dollar göndərmək sərfəlidir?

Bakupost.az -a açıqlamasında iqtisadçı Xalid Kərimli deyib ki, Azərbaycanda rubldansa dolların manata çevrilməsi daha sərfəlidir.
Onun sözlərinə görə, rublun alış və satış kursu arasındakı fərq dolların alış və satış kursu arasındakı fərqdən daha pisdir:
“Əhalinin dollar alışı və satışı daha aktivdir. Sanksiyaların təbii ki, rubla təsiri var. Rubl sürətlə dəyişən valyutadır və onlarda da alış və satış məsələsində fərq olur. Kursun həm də dünya bazarında oynama sürəti var və bu iki məqam rublla bağlı əməliyyatları çətinləşdirir. Valyutayla əlaqədar isə banklarda məcburedici məsələ yoxdur. Banklar istənilən valyutanı almaqdan və satmaqdan imtina edə bilər”.