Bu ilin ikinci rübündə Azərbaycan Gürcüstan iqtisadiyyatına 23,6 milyon ABŞ dolları həcmində investisiya yatırıb.

Gündəm24.az xəbər verir ki, bu barədə Gürcüstanın Milli Statistika İdarəsinin II rüb üzrə ilkin hesabatında bildirilib.

İllik müqayisədə investisiyaların həcmi 5,2 milyon ABŞ dolları, rüblük müqyaisədə isə 1,3 milyon ABŞ dolları azalıb. Azərbaycan sərmayələrinin Gürcüstan iqtisadiyyatına xaricdən cəlb olunmuş investisiyalardakı payı 4,1%-ə bərabər olub.

Qeyd olunan dövrdə Azərbaycan Gürcüstana ən çox sərmayə yönəltmiş ölkələrin ilk onluğunda VII yeri tutub. Gürcüstana ən çox sərmayə qoyan ölkələrin ilk üçlüyünə Böyük Britaniya (242,7 milyon ABŞ dolları), Türkiyə (54 milyon ABŞ dolları) və Çexiya (38,3 milyon ABŞ dolları) daxil olub.

Aprel-iyunda Gürcüstanda birbaşa xarici investisiyaların ümumi həcmi ötən ilin analoji dövrünə nisbətdə 12% azalaraq 580,1 milyon ABŞ dolları təşkil edib.

Ən çox sərmayə maliyyə və sığorta fəaliyyəti, daşınmaz əmlak, energetika, nəqliyyat, istehsal, hotel və restoranlar, tikinti, ticarət, inzibati fəaliyyət, incəsənət, əyləncə və istirahət sahələrinə qoyulub.

Qeyd edək ki, cari ilin ilk rübündə Azərbaycanın Gürcüstan iqtisadiyyatına qoyduğu sərmayələrin məbləği 25 milyon ABŞ dolları təşkil edib. Beləliklə, bu il Azərbaycanın Gürcüstana qoyduğu investisiyaların ümumi həcmi 48,5 milyon ABŞ dollarına bərabər olub.

Oxunub: 83