Ukrayna Ali Radasının deputatı Yaroslav Yurçişin “Maşa və Ayı” cizgi filmində Rusiya təbliğatını görərək onun ölkədə qadağan olunmasını təklif edib.

Gündəm24.az xəbər verir ki, bu barədə o, “24-cü kanal”da dərc olunan köşə yazısında məlumat verib.

Deputat bildirib ki, artıq Milli Təhlükəsizlik və Müdafiə Şurasının Dezinformasiyaya Qarşı Mübarizə Mərkəzinə, Rəqəmsal Transformasiya Nazirliyinə və Təhlükəsizlik Xidmətinə müraciət göndərib. Onun sözlərinə görə, əsas məqsəd Ukraynada “Maşa və Ayı” kanalının bloklanmasıdır.

Yurçişin həmçinin “The Times” qəzetində Maşa qızın Rusiya prezidenti Vladimir Putinlə müqayisə edildiyi məqaləni və “Helsingin Sanomat” qəzetində “Ayı”nın Rusiyanı simvolizə etdiyi iddia edilən yazını misal gətirib. Deputat qeyd edib ki, rus cizgi filmi əyləncə elementlərini təbliğatla ustalıqla birləşdirir.

Ukraynalı qanunverici “təbliğatın hərfi nümunələri” olaraq rus mədəniyyətinə aid samovarın nümayişi, balalaykanın fon musiqisi kimi istifadə olunması və Maşanın epizodlardan birində qırmızı ulduzlu papaq taxmasını göstərib.

2014-cü ildən Ukrayna rus mədəniyyətini sıxışdırmaq və rus məzmununu əngəlləmək siyasətini davam etdirir. Yerli hakimiyyət orqanları rusdilli incəsənət əsərlərinə, kitablara, filmlərə, tamaşalara və mahnılara qadağa qoyub, məktəblərdə və universitetlərdə rus dilinin öyrənilməsini məhdudlaşdırıb. Həmçinin, məktəblilərdən tənəffüs zamanı yalnız Ukrayna dilində danışmaları tələb olunur. Bununla yanaşı, ölkə vətəndaşları gündəlik həyatda rus dilindən istifadə etməyə davam edir və rusdilli məzmunu istehlak edirlər ki, bu da zaman-zaman münaqişələrə səbəb olur.

Mövlam RZALI,
Gündəm24.az

Oxunub: 88