"Şahdəniz" konsorsiumu "Şahdəniz Kompressiya" (ŞDK) layihəsi çərçivəsində platformanın üst modullarının tikintisi üçün 321 milyon dollar dəyərində müqavilə imzalayıb.

Gündəm24.az Teleqrafa -a istinadən xəbər verirki,"BP-Azerbaijan"dan verilən məlumata görə, müqavilə "Azfen" şirkətinə verilib.

Müqavilənin iş həcminə platforma üçün 8500 tonluq üst modullar blokunun inşası, montajı, quraşdırılması və inteqrasiyası daxildir. Tikinti işləri ölkə daxilində yerli infrastruktur və resurslardan istifadə etməklə "Azfen"in Bayıldakı tikinti-quraşdırma sahəsində həyata keçiriləcək.

Üst modulların tikintisinə 2025-ci ilin dördüncü rübündə başlanacağı və 2028-ci ilin sonuna başa çatdırılması planlaşdırılır.

Qeyd edək ki, "Şahdəniz" qaz yatağının işlənməsinin növbəti mərhələsi olan 2,9 milyard ABŞ dollarlıq ŞDK layihəsində məqsəd yataqdakı aşağı təzyiqli qaz ehtiyatlarını əlçatan etməklə onların hasilatını təmin etmək və beləliklə yataqdan maksimum qazvermə əmsalına nail olmaqdır. Layihənin Şahdəniz yatağından təxminən 50 milyard kubmetr əlavə qaz və 25 milyon barelə yaxın əlavə kondensat hasilatına və ixracına imkan yaradacağı gözlənilir.

Layihə çərçivəsində yeni kompressiya obyektinin – elektriklə işləyən, heyətsiz kompressiya platformasının (və ya Əsasən Heyətsiz Qurğu (eNUI)) inşası nəzərdə tutulur. Platforma suyun 85 metr dərinliyində, mövcud "Şahdəniz Bravo" platformasından təxminən 3 kilometr məsafədə quraşdırılacaq.

Tikinti işlərinin 2025-ci ilin sonlarında başlanacağı planlaşdırılır. Tikintinin 2029-cu ildə başa çatdırılması, 2030-cu ildə isə "Şahdəniz Bravo" platformasından hasil edilən qaz həcmlərini kompressiya etməsi planlaşdırılır.

Oxunub: 39