SSRİ-nin dağıldığı ilk illərdə milislər peçenye ilə maaş alıb, insanlar ciddi ərzaq çatışmazlığı ilə üzləşib. Lakin ölkədə yeganə real güc əlisilahlı canilər olub. Onlar hər şeyə nəzarət ediblər - bazarlardan fabriklərə, fahişələrdən tutmuş qəbiristanlıqdakı yerlərə qədər. Paradoksal olaraq, bir çox insanlar quldurların məmurlardan daha dürüst olduğuna inanıblar.

1990-cı illərdə gənclər arasında ölüm göstəricisi 35-70% artıb. Hər şəhərdə mütəşəkkil cinayətkar qruplar fəaliyyət göstərib və onların rəhbərləri nazirlərdən yaxşı yaşayıblar. Cinayətkarların gəlirlərinin dəqiq rəqəmləri hələ də məlum deyil, lakin fraqmentli məlumatlar rəsmi hökumətlə paralel mövcud olan cinayət imperiyasının miqyası haqqında təsəvvür yaratmağa imkan verir.

“Tver qurdları” - yolların sahibləri

Tverdən olan kiçik, lakin çox aqressiv qrup ölkənin ən mühüm iqtisadi arteriyalarından birinə - Moskva-Sankt Peterburq avtobanına “nəzarət” edib. Dəstə cəmi on nəfərdən ibarət olsa da, magistral yolda “vəziyyətə” onlar baxıb. “Lom” ləqəbli Aleksandr Kostenkonun xəbəri olmadan heç bir yük yoldan keçə bilməyib. Yanacaqdoldurma məntəqələri, yük daşımaları, yol kənarındakı kafelər və motellər “Tverskilər”ə xərac verib. Sahibkarlar ayda 1500 dollar, fahişələr gündə 600 rubl veriblər. Müqavimət göstərmək istəyənlər nümayişkaranə şəkildə öldürülüb - başqaları cəsarət etməsin deyə
“Lom” özü lüks həyat tərzində yaşayıb. Onun Tverin mərkəzində üçmərtəbəli malikanəsi, onlarla avtomobili olub. 1990-cı illərin əvvəllərində bir əyalət şəhəri üçün bu, görünməmiş dəbdəbə sayılıb.

Dəstənin ən qəddar cinayəti 2002-ci ildə müğənni Mixail Kruqun qətli olub. Plana əsasən Dmitri Veselov evi qarət edib ərazidən uzaqlaşacaqdı .Lakin həmin vaxt müğənni gözlənilmədən evə gəlib və qatil onu vurub. Bu kobud səhvə görə Veselov sonradan ətrafındakılar tərəfindən öldürülüb. 2006-cı ildə dəstə “Lom”un ölümündən sonra fəaliyyətini dayandırıb. Onun avtomobili pulemyotlarla deşik-deşik edilib, mütəşəkkil cinayətkar dəstənin sağ qalan üzvləri saxlanılaraq ömürlük həbs cəzasına məhkum ediliblər.

“Hadi Taktaş” - Kazanın sahibi


Tatarlardan ibarət “Hadi Taktaş” dəstəsi 1982-ci ildən 1999-cu ilə qədər Kazanı dəmir məngənəsində saxlayıb. Qırxdan çox şirkət, şəhərin bütün fahişələri və hətta qəbiristanlıqlar onların nəzarətində olub. Dəstənin icazəsi olmadan qohumu dəfn etmək və ya baş daşı qoymaq mümkün olmayıb.

Hətta Vasili Stalinin Arskoye qəbiristanlığındaki məzarı da dəstənin icazəsi ilə qoyulub. Bandanın başçısı “Raca” ləqəbli Radik Qaliəkbərov özü ilə bir milyon dollar nağd pul gəzdirib. O, qüdrətini nümayiş etdirərək sağa-sola pul atıb.

“Hadi Taktaş”ın üzvləri 50-yə yaxın insanı qətlə yetirib. Dəstənin sadə bir prinsipi olub: dəstəyə daxil olan adamın yalnız ölüsü çıxa bilər. 1999-cu ildə “Raca”nın qatillərindən biri onu satıb. 2002-ci ildə kriminal lider ömürlük “Qara delfin” həbsxanasına göndərilib.

“Orexovski” - seriallar üçün prototiplər

Dövrün simvoluna çevrilmiş “Orexovski” bandası 1990-cı illərin ortalarına qədər Rusiya paytaxtının taksi xidmətlərinə, dörd böyük bazara, “Kapital Ekspress” bankına və hətta Domodedovo hava limanına nəzarət edib.

Mütəşəkkil cinayətkar qruplaşmanın lideri, “Silvestr” ləqəbli, keçmiş Novqorod traktorçusu olan Sergey Timofeyev 14 milyon dolların sahibi olub. O, “Briqada”da “Saşa Belov”, “Buz dövrü”ndə “Rokki” və “Dəstələr” serialında “Silver” personajları üçün prototip olub. Acgöz və amansız olan dəstə böyük şirkətlər qazanclarının 30%-ni, kiçiklərin 70% -ni qamarlayıb. Xərac verməyə razı olmayanlar nümayişkaranə və amansızcasına öldürülüb. Dəstə rəsmi olaraq 30 qətl törədib, lakin qurbanların real sayı, yəqin ki, daha çoxdur.

Dəstənin qatillərindən biri “kriminal avtoritet” Saşa Makedonskini öldürən əfsanəvi Saşa Soldat olub. 1994-cü ilin iyununda “Orexovski” quldurları oliqarx Boris Berezovskinin avtomobilini partladıblar, lakin o, möcüzə nəticəsində sağ qalıb.

Dəstə 1994-cü ilin sentyabrında “Silvestr”in ölümündən sonra parçalanmağa başlayıb. Sergeyin avtomobili partladılıb. Onu əvəzləyən Sergey Butorinin (Osya) ciddi hörməti olmayıb və qrup dağılıb. “Orexovski” qatillərinin sonuncusu Dmitri Belkin yalnız 2012-ci ildə tutulub.

“Tambovskiye” - Sankt-Peterburqun gecə qubernatorları

1990-cı illərin ən böyük və ən nüfuzlu mütəşəkkil cinayət qrupunun 500-ə qədər üzvü olub. Onlar Rusiyada narkotik ticarətinin üçdə birinə nəzarət ediblər, hakimiyyətin ən yuxarı pillələrində adamları olub. “Kum” ləqəbli lider Vladimir Kumarin (Barsukov) Sankt-Peterburqun mərkəzində tarixi malikanəyə sahib olub və hesablarında 2 milyard dollara yaxın pul saxlayıb.

Şəhərdə Kumarin “gecə qubernatoru” adlanıb. O, özünü ədalətli və xalqa yaxın hakimiyyət sahibi kimi göstərib. Adi vətəndaşlar kömək üçün onun yanına gəlib və o, hər kəsə yardım edib. Dəstənin ən səs-küylü cinayəti 1998-ci ildə deputat Qalina Starovoytovanın qətli olub. O, Tambov dəstəsinin iki qatili tərəfindən öz mənzilinin girişində güllələnib. Qətlin sifarişçisi hələ də məlum deyil. Kumarin yalnız 2007-ci ildə həbs olunub və 15 il müddətinə azadlqdan məhrum edilib. Sonra bu müddət 24 ilə qədər artırılıb.
1990-cı illər geridə qalıb, lakin hazırda Rusiyada biznes üçün ən böyük təhlükə vergiləri və tənzimləyici orqanları ilə dövlətin özüdür. Bir çoxları quldurların məmurlardan daha dürüst olduğunu iddia edirlər.Gündəm24.az

Oxunub: 143