“Bakı bu gün seçim qarşısındadır: küləklər şəhəri olaraq qalmaq, yoxsa toz şəhərinə çevrilmək.”

Bu sözləri gundemtv.az-a Vətəndaş Həmrəyliyi Partiyasının sədr müavini Samir Əsədli deyib.

O qeyd edib ki, Bakıda havanın çirklənməsi artıq sadəcə ekoloji yox, həm də sosial problemə çevrilib. Onun sözlərinə görə, şəhərin ətrafında fəaliyyət göstərən daş və qum karxanalarının toz kütlələri güclü küləklərin təsiri ilə yaşayış massivlərinə qədər yayılır və bu, paytaxt sakinlərinin sağlamlığı üçün ciddi risk yaradır.

Əsədli vurğulayıb ki, karxanaların böyük hissəsi nəzarətsiz fəaliyyət göstərir, tələb olunan texnoloji tədbirlər – tozun qarşısını alan sistemlərin tətbiqi, yolların mütəmadi isladılması və materialların üstüörtüklü daşınması çox vaxt yalnız kağız üzərində qalır.

“Paytaxtın nəfəsini qorumaq üçün şəhər ətrafında genişmiqyaslı yaşıllaşdırma, qumlu sahələrin bərpası və karxanaların ciddi nəzarətə götürülməsi qaçılmazdır. Əks halda, Bakı ‘küləklər şəhəri’ adını itirərək ‘toz şəhərinə’ çevriləcək,” – deyə Əsədli əlavə edib.

Oxunub: 34