Oktyabrın 1-dən etibarən Azərbaycanda həqiqi hərbi xidmətə çağırış həyata keçiriləcək. Hal-hazırda Azərbaycanda həqiqi hərbi xidmətə çağırılan əsgərlər rəsmi maaş almır. Misal üçün, ABŞ-da yeni əsgər ayda təxminən 2,000–2,500 dollar alır. Bəs, həqiqi hərbi xidmət keçən əsgərlərə maaş verilməlidirmi?

Bu barədə KONKRET.az-a açıqlama verən hərbi ekspert Üzeyir Cəfərov bildirib ki, çağırışçı əsgərlərə maaş deyil, yalnız gündəlik xırda tələbatlarını ödəmək üçün müəyyən məbləğdə vəsait ayrılır.

Üzeyir Cəfərova Polkovnik hərbi rütbəsi verildi | Baku.ws Xəbər saytı - Son xəbərlər və Hadisələr

Ekspertin sözlərinə görə, sıravi əsgərlərlə müqayisədə çavuş heyəti və müddətdən artıq xidmət edənlər artıq kiçik komandir sayıldıqları üçün məvacib alırlar:

“Əsgərlər işləmirlər ki, maaş alsınlar. Onların yeməyi, geyimi, yataq yeri və digər əsas tələbatları dövlət hesabına qarşılandığından, yalnız şəxsi xırda ehtiyaclar üçün müəyyən məbləğ ödənilir.”

Üzeyir Cəfərov ABŞ və Azərbaycan əsgərlərinin sosial təminatlarını müqayisə etməyin doğru olmadığını qeyd edib:

“Amerika əsgərlərinə həm ölkənin iqtisadi imkanlarına görə, həm də fərqli tələbatları üçün daha böyük vəsait ayrılır. Bizdə isə dövlət bütün əsas təminatı öz üzərinə götürür.”

Ekspert bildirib ki, bir müddət əvvəl əsgərlərə siqaret də dövlət hesabına verilsə də, sağlamlıqla bağlı səbəblərə görə bu praktika dayandırılıb.

Cəfərov həmçinin vurğulayıb ki, hazırda hərbi xidmətə çağırılan əsgərlərin ailə üzvlərinə də dövlət tərəfindən aylıq ödənişlər edilir:

“Əgər onun övladı və həyat yoldaşı varsa, bu məsələyə də vəsait ayırmağa başladılar. Miqdarı çox böyük olmasa da, bu, əsgər ailələri üçün müəyyən maddi dəstəkdir. Ümid edirəm ki, gələcəkdə Azərbaycanda da həqiqi hərbi xidmət keçən əsgərlərə daha böyük məbləğdə vəsait ayrılacaq.”

Oxunub: 49