Xəbər verdiyimiz kimi, sosial şəbəkədə Bakıda qrilin içindən qurd çıxmasıyla bağlı görüntülər yayılıb. Qrilin 8 Noyabr prospektində yerləşən “Təndir N-1”dən alındığı bildirilir.
Qida Təhlükəsizliyi Agentliyindən Bakupost.az-a bildirilib ki, məsələ artıq nəzarətə götürülüb və araşdırma aparılır.


Məsələ ilə bağlı Bakupost.az -a danışan qida mütəxəssisi İlkin Şirinov kafe və restoranlarda qida məhsullarına, hazırlanmış yeməklərin saxlanma şəraitinə nəzarəti gücləndirməyin vacib olduğunu bildirib.
O qeyd edib ki, havaların isti keçməsi, tez-tez dəyişməsi nəzərə alınmalıdır:
"Qida məshullarının saxlanma şəraiti normativə, standartlara uyğun olmasa, bu zaman birmənalı şəkildə tərkib dəyişikliyi baş verəcəkdir”.
İ.Şirinov qrildən qurd çıxmasıyla bağlı yayılan görüntüləri isə belə şərh edib:
“Görüntülərə baxanda belə qənaətə gəldim ki, qril odun sobasında deyil, elektrikli sobada hazırlanıb. Toyuq məshulunun tam bişməsi üçün 200-250 dərəcə tepmeratur lazımdır. Həmin temperaturda orada müxtəlif parazitlərin qalması mümkün deyil. Məsələnin ikinci tərəfi odur ki, əgər bu məhsulların daşınmasına və saxlanmasına düzgün əməl olunmazsa, qida zəncirinin qırılması halı baş verərsə və hətta bişməmişdən öncə toyuq ətinin tərkibində hansısa bir qurd olarsa, o temperaturda sağ qala bilməz. Amma görüntülərdə görünür ki, o parazitlər sağdır.
Toyuq məhsulları 200-250 dərəcə tepmeraturda bişdikdən sonra dərhal satışa çıxarılmalı və satılmalıdır:
"Artıq üstündən 1 gün keçdikdən sonra isə qalan məhsullar satışdan kənarlaşdırılmalıdır. Burda belə aydın olur ki, heç bir kənarlaşdırma halı olmayıb, toyuq məhsulu bişdikdən sonra qalıb, düzgün saxlanma şəraiti seçilməyib və onun tərkibində parazitlər əmələ gəlib”.