“Bu gün dünya tarixinin ən ağır və qanlı müharibələrindən biri olan İkinci Dünya Müharibəsinin (1939-1945) başa çatmasından 80 il ötür. 9 may bəşər tarixinə faşizm üzərində Qələbə günü kimi düşüb. Bu müharibədə Azərbaycanın oynadığı rol misilsizdir”.
Gündəmtv.az xəbər verir ki, bunu Milli Məclisin deputatı Fəzail İbrahimli deyib.
Deputat bildirib ki, Azərbaycan öz nefti, qəhrəman əsgərləri və hərbi təchizatı ilə müharibədə qələbənin əldə olunmasında həlledici rol oynayıb: “Avtomobil, tank, təyyarə və gəmilərin yanacaq təchizatı böyük miqdarda neft tələb edirdi. Sovet ordusu üçün bu tələbatı əsasən Bakı qarşılayırdı. Bakı neftinin təmin etdiyi yanacaq müharibənin müxtəlif cəbhələrində sovet ordusuna həlledici üstünlük qazandırdı. Təsadüfi deyildir ki, faşist Almaniyası Azərbaycanı məhz neftinə görə işğal etmək üçün xüsusi plan hazırlamışdı. Azərbaycan müharibəyə 700 minə yaxın əsgər göndərmiş, onların çoxu döyüş meydanlarında canlarından keçib. Azərbaycanın İkinci Dünya müharibəsindəki rolu tarixi və mənəvi baxımdan çox böyükdür. Bu müharibə Həzi Aslanov, İsrafil Məmmədov, Mehdi Hüseynzadə, Əhmədiyyə Cəbrayılov, Yusif Sadıqov və yüzlərlə belə əfsanəvi Azərbaycan qəhrəmanlarını dünyaya tanıtdı. Azərbaycan elmi və səhiyyəsindən tutmuş mədəniyyətinə kimi cəmiyyətin bütün sahələri müharibədə qələbənin təmin olunmasına əvəzsiz töhfə vermişdir. Bu illər Azərbaycan xalqı əsl birlik, dözümlülük və vətənpərvərlik nümayiş etdirmişdi. Azərbaycanın qələbədə bu qədər xidməti olmasına baxmayaraq, çox təəssüf ki, qələbədən sonrakı dövrdə Bakıya "Qəhrəman şəhər" adı verilmədi. Azərbaycan bütövlükdə müharibədəki uğurlarına görə heç bir dəyər sahibi olmadı. Bu, təbii ki, imperiyanın əsl mahiyyətindən irəli gəlirdi”.
Deputat onu da əlavə edib ki, ancaq dözümlülük, bütövlük, cəsarət, birlik kimi keyfiyyətlər Azərbaycan xalqına xas olduğu üçün müstəqillik dövründə işğal olunmuş torpaqlarımız xalqımızın gücü və əzmi ilə düşməndən azad edildi: “Müharibələr tarixinə yeni imza atıldı”.
