“Ev şəraitində turşu hazırlanan zaman istifadə olunan meyvə-tərəvəzlər mövsümünə uyğun olmalıdır. Mövsümündə olmayan tərəvəzlər istixanalarda müxtəlif kimyəvi pereparatların köməyi ilə yetişdirilir. Bu tərəvəzlərdən turşu hazırlamaq tövsiyə edilmir".
Gündəmtv.az xəbər verir ki, bunu "Yeni Sabah”a qida eksperti İlkin Şirinov deyib. Onun sözlərinə görə, digər vacib şərt gigiyenik qaydalarla bağlıdır:
"Həmin ərzaqlar tam yuyulub təmizlənməlidir. Turşu hazırlanacaq banka və digər qablar steril olmalıdır".
İlkin Şirinov daha həssas məqamın olduğunu qeyd edib:
"Ev şəraitində ərsəyə gətirilən turşuların tərkibinə heç bir mütəxəssislə məsləhətləşmədən dərman vasitələri, o cümlədən "tetraçiklin", "parasetamol" və s. qatılır. Turşuluq dərəcəsini ölçmədən sirkələr əlavə olunur. Bu nə dərəcədə düzgündür? Yaxud bunu istifadə edərkən kiminlə məsləhətləşirlər? Hansı mütəxəssis bunu sizə tövsiyə edir? Son nəticə isə insan sağlamlığı hesabına başa gəlir”.
Ekspert vacib tövsiyələr verib: “Daha bir diqqət ediləcək məqam saxlama şəraitidir. Turşular hazırlandıqdan sonra rütubətsiz, günəş işığı olmayan, sərin və quru yerdə saxlanmalıdır. İkinci məsələ isə turşunun suyunda hər hansısa bulanıqlıq, yaxud tərəvəzin üzərində kif örtüyü olarsa, bu qidadan istifadə etmək qətiyyən yol verilməzdir. Əgər turşu hazırlanan qabın qapağında gözlə görünən bir şişmə varsa, bu artıq təhlükədən xəbər verir.
Təəssüf ki, bu gün insanlarımız onu təkrar istifadə edirlər. Nəticədə ev şəraitində hazırlanan turşulardan zəhərlənmə halları həddən artıq çox olur. Turşudan zəhərlənmə hətta ölümə qədər gətirib çıxara bilir.
Market və mağazalarda üzərində markalanma və istifadə müddəti olan məhsulların alınması və istifadəsi daha məqsədəuyğundur. Çünki bu məhsullara AQTA nəzarət edir”.
