"Mövsüm başlamamasına rəğmən artıq alça və çiyələyi bazarda görmək mümkündür".

Bu sözləri qida məsələləri üzrə ekspert İlkin Şirinov Hit.az-a açıqlamasında deyib.

O bildirib ki, ağacların yeni çiçək açmağa başladığı bir zamanda bu meyvələrin satışda olması müəyyən suallar doğurur:

"İstixana şəraitində yetişdirilmiş alça və çiyələk mövsümündən əvvəl satışa çıxır. Onların yetişdirilməsində azot gübrələri və müəyyən qidalandırıcılardan istifadə olunur. Belə meyvələrin bir ədədi belə olduqca böyük olur. Elə həmin meyvələrə baxanda onu yetişdirmək üçün bol şəkildə gübrələrdən və qidalandırıcılardan istifadə edildiyi aydın olur".



Mütəxəssis vurğulayıb ki, təbii olaraq bu şəkildə yetişən meyvənin insan sağlamlığına hansısa bir faydasından danışmaq mümkün deyil:

"Onların insan orqanizminə hər hansısa faydasından söhbət belə gedə bilməz. Hətta hazırda bazarda alçanın 1 kiloqramını 50 manata təklif edirlər. 200 qramlıq qablarda 10 manata satılan alça da var. Eyni zamanda, 100 qram adı ilə satılan 85-90 qramlıq qablarda isə cəmi 3-4 alçanı 5-6 manata təklif edirlər.

Ümumiyyətlə, alçanı bu qiymətə insanlara sırımaq nəyə xidmət edir? Əslində, istənilən meyvə-tərəvəzi mövsümündə alıb yemək gözəl olur. Mövsümündə yetişən meyvələrin dadlı olduğunu da unutmaq olmaz. Lakin vaxtından öncə satışa çıxarılan alçanın 1 kiloqramını 50 manata, 70 manata almağın heç bir faydası yoxdur".