Cənub-Şərqi Asiya turnesindən dərhal sonra bu həftə Pekində Azərbaycan və Keniyadan olan həmkarlarını qəbul etməyə hazırlaşan Çin Prezidenti Si Cinpin inkişaf etməkdə olan ölkələrlə diplomatik fəaliyyəti davam etdirir.
Gündəmtv.az “Nikkei”yə istinadən xəbər verir ki, müşahidəçilərin fikrincə, Azərbaycan və Keniyanın dövlət başçılarının səfərləri Pekinin inkişafı dəstəkləmək üçün yeni tərəfdaşlara doğru strateji addımını əks etdirir.
"Çin hər dəfə Qərb ölkələri tərəfindən gərginlik, qarşıdurma və təcridlə üzləşdikdə daha güclü şəkildə - daha çox diqqət və intensivliklə inkişaf etməkdə olan dünyaya doğru üz tutur", - Vaşinqtondakı Afrika Strateji Araşdırmalar Mərkəzinin elmi işçisi Pol Nantulya bildirib.
Keçən həftə Si Cinpin Vyetnam, Malayziya və Kambocaya səfər edib, orada iqtisadi əlaqələri gücləndirməyə yönəlmiş onlarla sazişin imzalanmasını müşahidə edib. Dünyanın ikinci ən böyük iqtisadiyyatı deflyasiya təzyiqinə qarşı durmağa və Vaşinqtonla "ticarət müharibəsi" dövründən üzüağ çıxmağa çalışır.
"Çin Afrikadakı "dostlar dairəsi" ilə əlaqələrini sürətlə gücləndirəcək, onların arasında Keniya son illərdə mühüm yer tutur ", - Nantulya əlavə edib.
ABŞ inkişaf etməkdə olan dünyaya yardımı azaltdığı halda, Çin, görünür, istənilən vakuumu doldurmağa çalışır və özünü ABŞ-nin rəhbərlik etdiyi dünya nizamına alternativ kimi təqdim edir. Bir çox ekspertlər iddia edirlər ki, ABŞ-nin hazırkı siyasəti Pekinə özünü çoxtərəfliliyin müdafiəçisi kimi təqdim etməyə imkan verir, Si Cinpin bu mövzunu bu yaxınlarda Vyetnamda təbliğ edib.
Keniyalı Ruto üçün bu, ötən ilin sentyabrında Çin-Afrika Əməkdaşlıq Forumunda iştirak etdikdən sonra bir ildən az müddətdə Pekinə ikinci səfəri olacaq. Gözləntilərə görə, o, forum zamanı Pekinin Afrika ilə əlaqələrini "strateji səviyyəyə" çatdırmasından istifadə edərək Keniyanın əsas infrastruktur layihələri üçün maliyyələşdirmə mənbəyi axtaracaq, ticarəti və texnoloji dəstəyi genişləndirəcək.
Çinin Afrika ilə ümumi ticarəti on il ərzində, demək olar ki, iki dəfə artaraq 2024-cü ildə 295 milyard dollara çatıb.
Bundan başqa, Azərbaycan lideri İlham Əliyev də keçən ilin iyulunda Qazaxıstanda Şanxay Əməkdaşlıq Təşkilatı sammiti çərçivəsində aparılan danışıqlardan sonra Si Cinpinlə yenidən görüşəcək.
Xəzərin sahilində yerləşən respublika Çin və Avropa arasında mühüm ticarət bağlantısı rolunu oynayır. ABŞ-nin multimedia təşkilatı olan “China Global South” layihəsinin qeyri-rezident əməkdaşı Yunis Şəriflinin sözlərinə görə, son illərdə Azərbaycan bərpaolunan enerji, elektrik avtomobilləri və telekommunikasiya sahələrində Çin şirkətlərini cəlb edib.
Azərbaycan Rusiya və Avropa da daxil olmaqla ənənəvi tərəfdaşlarla və Qlobal Cənubun aparıcı qüvvələri, ilk növbədə, Çinlə münasibətlərdə tarazlığa can atır.
Çinin “Longi Green Energy Technology” şirkəti və və elektrik avtomobilləri istehsalçısı olan BYD şirkəti Azərbaycan iqtisadiyyatının şaxələndirilməsini dəstəkləyən investorlar arasında yer alır.
Bazar ertəsi Çinin “Sinxua” dövlət xəbər agentliyinə müsahibə verən Prezident İlham Əliyev bildirib ki, transsərhəd nəqliyyat dəhlizi ("Orta Dəhliz") Pekinin "Bir kəmər, bir yol" təşəbbüsü üçün yeni iqtisadi imkanlar yaradacaq, çünki o, bərpaolunan enerji və yüksək texnologiyalı sahələrdə əməkdaşlığı genişləndirməyə çalışır.
