Azərbaycan Cənubi Qafqaz regionunda öz təbii sərvətlərindən davamlı və dinamik inkişaf üçün səmərəli istifadə edən strateji əhəmiyyətli ölkədir.
“Gündəmtv.az” xəbər verir ki, bu barədə İordaniya Universitetinin Strateji Araşdırmalar Mərkəzinin direktoru doktor Hassan əl-Momaninin Bakıda "Yeni dünya nizamına doğru" mövzusunda keçirilən beynəlxalq forumun yekunlarına həsr olunmuş məqaləsində bildirilib.
Əl-Momani xatırladıb ki, beynəlxalq forum ADA Universiteti tərəfindən təşkil olunub və 90-dan çox alim, ekspert və beyin mərkəzlərinin nümayəndələrini bir araya gətirib.
Müəllif qlobal aktual məsələlərin müzakirə olunduğu forumun həm formatı, həm də gündəliyi ilə bağlı heyranlığını ifadə edib.
"İştirakçıların İordaniyaya və onun kralı II Abdullaha göstərdiyi maraq xüsusi diqqət cəlb edib. Əminəm ki, kralın Mərkəzi Asiya və Cənubi Qafqaz ölkələri, xüsusilə də Azərbaycanla əlaqələrin qurulması və möhkəmləndirilməsi istiqamətində uzaqgörən siyasəti uğurlu tərəfdaşlığın təməl daşı olub. Möhkəm ikitərəfli əlaqələrin əsası Kral II Abdullah və Azərbaycan Prezidenti İlham Əliyev tərəfindən qoyulub və nəticə etibarilə örnəyə çevrilib", - o qeyd edib.
Direktor həmçinin məmnunluqla qeyd edib ki, forum çərçivəsində ölkələrin regional təhlükəsizlik və inkişafda roluna həsr olunmuş sessiyada məruzəçi kimi çıxış edib. "Məhdud təbii sərvətlərə malik olmasına baxmayaraq, İordaniyanın ən mürəkkəb regionlardan birində necə mühüm mövqe tutması barədə danışmaq fürsəti əldə etdim", - əl-Momani vurğulayıb.
Xatırladaq ki, aprelin 9-da ADA Universitetində Azərbaycan Prezidenti İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib.
Report.az
