"Hazır qəhvə təbii qəhvə qədər sağlamdır".
Gündəmtv.az xəbər verir ki, bu sözləri rusiyalı dietoloq həkim Nataliya Pavlyuk deyib.

Onun sözlərinə görə, aparılan araşdırmalarda adətən təbii və həll olan (əriməli) qəhvə arasında fərq qoyulmur. Bu isə onların faydalı xüsusiyyətlərinə görə bir-birinə bərabər tutulmasına əsas verir:

"Adətən araşdırmalarda bu içkinin faydaları göstərilir, məsələn, o, ömrü uzadır, onkoloji xəstəliklərin, aritmiyanın, ürək-damar xəstəliklərinin inkişafı riskini azaldır. Bundan əlavə, qəhvə qaraciyər üçün də faydalıdır, çünki ödqovucu xüsusiyyətə malikdir".

Bununla yanaşı, həkim qeyd edib ki, ümumiyyətlə, həll olan qida məhsulları, o cümlədən həll olan qəhvə bəzi antioksidant maddələri itirdiyi üçün təbii məhsullara nisbətən bir qədər az faydalı olur:

"Həll olan qəhvə iki cür olur: sublimasiya olunmuş və qranullaşdırılmış. Birincisi daha çox faydalı maddəni saxlayır və daha yaxşı sayılır: onun faydalı xüsusiyyətlərinə görə təbii qəhvəyə bərabər tutulması mümkündür".

Dietoloqun sözlərinə görə, qəhvəyə hər kəsin orqanizmi fərqli reaksiya verir və bu fərqlilik nəzərə alınmalıdır. Məsələn, acqarına qəhvə içmək bədəndə insulin ifrazını poza bilər, bu da karbohidratların mənimsənilməsinə mənfi təsir göstərir. Mədə xorası olan insanlarda isə qəhvə içmək çox vaxt qıcqırmaya (ürək yanmasına) səbəb olur.