Xəbər verdiyimiz kimi, Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallas Ukraynaya əlavə 40 milyard avro maliyyə yardımı ayırmaq planından imtina etməli olub. Bundan əvvəl Aİ Ukrayna üzrə danışıqlar üçün xüsusi nümayəndə təyin etməyi də təxirə salıb. Halbuki xüsusilə Fransa Prezidenti Emmanuel Makron buna namizəd idi.
Bu kimi addımlar Aİ-nin Ukrayna məsələsində daha passiv mövqe tutduğunu və proseslərdən tədricən geri çəkildiyini göstərir.
Aİ-nin Ukrayna məsələsində sürətlə geri çəkilməsinin səbəbləri nədir? ABŞ və ya Rusiya ilə gizli razılaşmalar mümkündürmü?
Gündəmtv.az xəbər verir ki, Globalinfo.az-a danışan siyasi şərhçi Əziz Əlibəyli bildirib ki, Kaya Kallasın çıxışında Rusiya-Ukrayna müharibəsi ilə bağlı maraqlı məqamlar və müəyyən ipucları mövcuddur:
“Kallas bildirir ki, 27 ölkə atəşkəsi dəstəkləyir. Bu, olduqca mühüm məsələdir. Yəni bütün dövlətlər sülh istəyir. Bildiyiniz kimi, bir ay əvvəl Ukraynada qeyd-şərtsiz atəşkəs razılaşdırılmışdı. Ancaq bütün ölkələrin razılığını ehtiva edən konsensusu əldə etmək son dərəcə çətindir. Məhz bu səbəbdən tərəddüdlər yaranır.
Rusiyanın Ukraynanın Sumı şəhərinə hücumu nəticəsində təxminən 20 nəfərin həlak olması, Avropa İttifaqı daxilində rəsmi Moskvanın əslində sülh istəmədiyi qənaətini daha da gücləndirib
Kallas bu vəziyyətdən çıxış yolunu Rusiyaya daha çox təzyiq göstərməkdə görür. Lakin bu təzyiqlərin konkret hansı üsullarla həyata keçiriləcəyinə dair detallı açıqlama vermir. Hazırda bəzi ölkələr Ukraynaya hücum silahları, bəziləri müdafiə silahları göndərir. Digərləri təlimlər keçirir, maliyyə yardımı edir və s. Yəni dəstək müxtəlif formalarda həyata keçirilir”.
Əziz Əlibəylinin sözlərinə görə, Avropa İttifaqına üzv ölkələr tərəfindən ümumilikdə 73 min Ukrayna əsgəri təlim keçib və silahlandırılıb. Lakin bu addımların özlüyündə 100 faiz nəticə vermədiyi artıq bəllidir:
“Əgər hərbi sahədə yetərli nəticələr əldə olunmursa, deməli, Avropa İttifaqı Rusiya üzərində təzyiqləri artırmaq üçün 17-ci sanksiya paketi üzərində işləyir. Kaya Kallas da açıq şəkildə bildirir ki, bu yeni sanksiyalar paketi ilə Rusiyaya zərbə vurulacaq”.
Siyasi şərhçi əlavə edib ki, 9 may faşizm üzərində Qələbə Günündə dünya iki yerə bölünəcək:
“Bəzi ölkələr Moskvaya gedərək Qələbə paradında iştirak edəcək. Avropa İttifaqı isə özünün “şayka”sı olan ölkələri həmin gün Kiyevə dəstək məqsədilə Ukraynaya səfər etməyə çağırır”.
