Avropa Yenidənqurma və İnkişaf Bankı (EBRD) Azərbaycanda logistika sistemlərinin enerji səmərəliliyinin yaxşılaşdırılması potensialını öyrənir.
Bu barədə “Report”a müsahibəsində EBRD-nin Dayanıqlı İnfrastruktur Qrupunun idarəedici direktoru Harri Boyd-Karpenter bildirib.
Onun sözlərinə görə, EBRD dayanıqlı infrastruktur sahəsində daim yeni imkanlar axtarır.
“Hazırda Azərbaycanda bu sahədə aktiv layihəmiz yoxdur, lakin biz logistika sistemlərinin enerji səmərəliliyinin və ekoloji göstəricilərinin yaxşılaşdırılması potensialını, xüsusən də Orta Dəhlizin inkişafı kontekstində yaxından öyrənirik. Bu marşrut strateji əhəmiyyət kəsb edir və logistika zəncirinin təkcə səmərəli və sürətli deyil, həm də ekoloji cəhətdən təmiz olması vacibdir”, - H. Karpenter qeyd edib.
İdarəedici direktor bildirib ki, bank təkcə Azərbaycanda deyil, həm də Mərkəzi Asiya ölkələrində dayanıqlı nəqliyyat infrastrukturuna sərmayə qoyur və bütün dəhlizin davamlı inkişafına töhfə verir.
“Ona görə də biz logistikanın “yaşıl” transformasiyasına yönəlmiş layihələrdə maraqlıyıq”, - o əlavə edib.
H.Karpenter vurğulayıb ki, bank Azərbaycanda bu istiqamətdə konkret təşəbbüslər həyata keçirmir, “lakin biz dialoqa açığıq və potensial layihələri nəzərdən keçirməyə hazırıq”.
