"Azərbaycanın Ermənistanın işğalçı siyasətinə son verib tarixi qələbə çalmasından 4 il keçməsinə baxmayaraq, hələ də bəzi qüvvələr qələbəmizi həzm edə bilməyirlər. Bu qüvvələr hər vəchlə Azərbaycanın qələbəsinə kölgə salmağa, Cənubi Qafqazda gərginliyin davam etməsinə çalışırlar. Bu məqsədlə də hər zaman olduğu kimi yenə də Ermənistana dəstək verməklə çirkin niyyətlərinə nail olmaq istəyirlər".
Bunu Ölkə.Az-a açıqlamasında deputat Məlahət İbrahimqızı deyib.
Deputat bildirib ki, son zamanlarda erməni lobbisinin təsiri altında olan konqresmenlər yenə də Azərbaycana təzyiq edib tutduğu yoldan döndərmək məqsədilə yalan, iftira dolu kampaniyaya başlayıblar. "Əsas hədəf Azərbaycanın qələbəsinə kölgə salmaq, bölgədə öz maraqlarını təmin etməkdir. Cənab Prezident İlham Əliyev də bu günlərdə Cəbrayıl sakinləri ilə görüşündə açıq şəkildə bəyan etdi ki, bu kampaniyanın başında ABŞ Dövlət Departamenti dayanır. Təəssüflə qeyd etmək lazımdır ki, anti-Azərbaycan güclər və erməni lobbisinin təsiri altında olan bir sıra dairələr Azərbaycanın COP29-a ev sahibliyi edəcəyindən istifadə edərək, Azərbaycana hansısa şərtləri diktə etmək istəyinə düşüblər. Bir qrup amerikalı senat və konqresmenin ABŞ dövlət katibi Entoni Blinkenə Azərbaycanla bağlı ünvanladığı müraciət də mərkli planlara xidmət edən hərkətlərdən biridir. Amma unutmasınlar ki, bu cür çirkin planlarla Azərbaycanı tutduğu yoldan döndərmək mümkün deyil. Azərbaycan Ermənistanın işğalçı siyasətinə son verərək ərazi bütövüyünü və suverenliyini bərpa edib. Azərbaycan 2020-ci ildə Cənubi Qafqazda yaratdığı reallığa uyğun olaraq bölgədə dayanıqlı sülhün, sabitliyin, inteqrasiya olunmuş sıx əməkdaşlıq formatının yaradılması istiqamətində səylər göstərməklə yanaşı, "Böyük Qayıdış"ın reallaşması istiqamətdə Qarabağ və Şərqi Zəngəzurda sürətli şəkildə tikinti-abadlıq işləri görülməkdədir. Məhz cənab Prezidentin yürütdüyü siyasət nəticəsində qısa zamanda Qarabağ və Şərqi Zəngəzurda həyat öz əvvəlki məcrasına dönməkdədir. Minlərlə soydaşımız 30 ilə yaxın didərgin düşdüyü ata yurdlarına qayıtmaqdadırlar.
Onu da qeyd etmək lazımdır ki, Azərbaycan bunu təkbaşına və heç bir xarici ölkədən dəstək almadan həyata keçirməkdədir. Azərbaycan azad olunmuş torpaqlarda abadlıq-tikinti işləri ilə yanaşı, Ermənistanın işğalçılıq siyasətinin izi olan və hələ də davam edən mina terrorunun təhlükələrini aradan qaldırmaqdadır. Bu gün ermənilərə havadarlıq edən qüvvələr İrəvanı sülhə sövq edib inkişafa nail olmaq əvəzinə, Ermənistanı yenidən gərginlik yaratmağa təhrik edirlər. Amma onu da unudurlar ki, onlar bölgədə qüvvələr münasibətini dəyişə bilməyəcəklər. Bundan itirən tərəf yenə də Ermənistan olacaq", - o qeyd edib.
Deputat sonda onu da bldirib ki, Azərbaycanın səbri tükənməz deyil: "Azərbaycan ona sərgilənən münasibətə qarşı cavab reaksiyası vermək gücünə qadirdir. Hesab edirəm ki, ABŞ yürütdüyü siyasətdən əl çəkməzsə, o zaman Bakı Vaşinqtonla ikitərəfli münasibətlərinə yenidən baxaraq daha ciddi addımlar ata bilər və bu istisna deyil".
