Qəbələdə keçirilən toy mərasimində 55 nəfər qidadan zəhərlənib. Bir neçə gün öncə Gəncə və Göygöyldə də eyni hal yaşanmışdı.
http://Gündəmtv.az -a açıqlamasında Azad İstehlakçılar Birliyinin sədri Eyyub Hüseynov son bir ayda xeyli zəhərlənmə hadisələrinin qeydə alındığını vurğulayıb.
Onun sözlərinə görə, mətbuat vasitəsilə alınan məlumatlar həqiqi olanların 60-70 faizini əks etdirir:
“Bu cür intensiv zəhərlənməni görən AQTA rəhbərliyi istefa verməli, vəziyyət dəyişməlidir. Özünə hörmət edən insan postunu qoyub gedər və deyər ki, mən bu işi yerinə yetirə bilmirəm. AQTA-nin ən ciddi problemi cəmiyyətlə işləyə bilməməsidir. Məndə olan məlumata görə, rayon yerlərində toy edən şəxs toydan bir iki məhsul götürüb AQTA-nin regional ofisinə gedir, orda guya onları analiz edirlər və ona bir sənəd verib yola salırlar. Bu yalançı kağızlara, ekspertizalara son qoyulmalıdır. Müstəqil ekpertiza yaranmalıdır və onun rəyi məhkəmədə tanınmalıdır”.
E.Hüseynov statistikanın gizlədilməsi və zəhərlənmələrin qeydiyyata alınmaması məsələsinin ölkədə anormal vəziyyətə gətirib çıxardığını deyib:
“Bütün cəmiyyət media işçilərinə minnətdar olmalıdır ki, onlar bunu izləyib gündəmə gətirirlər. Bəs, görən AQTA medianın işlərini izləyirmi?! Mən İctimai Şuranın üzvü olanda dəfələrlə demişəm ki, siz gərək media ilə əlbir işləyəsiniz. Onların isə ayaqları yerdən üzülüb. Milyon dollarlıq labarotiyalar, Avropa Birliyinin sənədləri və sair bunların ağıllarını başlarından alıb və elə bilirlər ki, bu şəkildə məsələni həll etmək olar. Cəmiyyətin, xalqın içinə enmək lazımdır. AQTA-nin saytında zəhərlənmələrin statistikası dünya ölkələrindən 1400 dəfə az göstərilir. Bu məsələləyə son qoyulub ölkənin mükəmməl istehlakçı siyasəti formalaşmalıdır”.
[media=http://]