2024-cü il avqust ayının 3-də Suraxanı rayonunda 2023-cü ildə Qarabağda keçirilmiş antiterror əməliyyatları zamanı şəhid olan Məmmədov Adilxan Almurad oğlunun mövlud günü qeyd olunub.

Qeyd edək ki, Məmmədov Adilxan Almurad oğlu 1973- cü il avqustun 5-də Qərbi Azərbaycanın Amasiya rayonunda anadan olub. 30 ilə yaxın Azərbaycan Respublikası Müdafiə Nazirliyinin tabeliyindəki müxtəlif hərbi hissələrdə xidmət edib. Prezident İlham Əliyev, müdafiə naziri Zakir Həsənov və digər yüksək rütbəli şəxslər tərəfindən təşəkkürə layiq görülüb, Fəxri Fərmanlarla təltif edilib.

Tədbir Ümummilli Lider Heydər Əliyevin və Şəhidlərimizin əziz xatirəsinin bir dəqiqəlik sükutla anılması, Azərbaycan Respublikası Dövlət Himninin səslənməsi ilə başlayıb, daha sonra Şəhidimizə həsr olunan mahnılar oxunub, şeirlər söylənib. Tədbir zamanı Azərbaycanın ərazi bütövlüyü uğrunda canından keçmiş bütün şəhidlərimiz yad edilib.

Tədbirdə Qərbi Azərbaycan İcmasının Nəzarət - Təftiş Komissiyasının sədr müavini, VI çağırış Milli Məclisin deputatı Şahin İsmayılov və İcmanın aparat rəhbəri Qalib Qasımov çıxış edərək qəhrəmanlarımızın əziz xatirəsinin xalqımızın qəlbində əbədi yaşayacağını bildirmişlər.
Şəhidlərimizi ehtiramla yad edirik!