Gündəm24.az xəbər verir ki, sabiq deputat Vahid Əhmədov “MediaTürk” telekanalına müsahibəsində 1993-cü ildə baş verən maraqlı hadisəni açıqlayıb. Həmin vaxt ölkəyə Ulu Öndər Heydər Əliyev rəhbərlik edirdi, Vahid Əhmədov isə Baş nazirin müavini vəzifəsində çalışırdı.

Onun sözlərinə görə, həmin dövrdə Rusiya Azərbaycana silah satmırdı və müəyyən növ hərbi texnika çatışmırdı. Heydər Əliyev, Ukraynanın o zamankı Baş naziri ilə yaxşı münasibətləri olan Əhmədova müraciət edərək ordunun ehtiyac duyduğu silahların Ukraynadan gətirilməsini tapşırıb. Ukrayna tərəfi buna razılıq verib, lakin əvəzində pul deyil, yanacaq istəyib.

“Ukrayna ilə razılaşdıqdan sonra Müdafiə Nazirindən lazım olan silahların siyahısını aldım. Nəticədə Azərbaycana təxminən 100 ədəd hərbi texnika, o cümlədən tank gətirildi”, – deyə Əhmədov bildirib.

Lakin daha sonra Heydər Əliyevin iştirakı ilə keçirilən iclasda Müdafiə Nazirliyinin nümayəndələri gətirilən tankların Azərbaycanda işləmədiyini deyiblər. Prezidentin bunun səbəbini soruşmasına cavab olaraq Əhmədov, “Mən nazirliyin verdiyi siyahıya uyğun gətirmişəm” deyib.

Məhz bu an, o zamankı Baş Qərargah rəisi Nəcməddin Sadıkov “biz heç vaxt belə sifariş verməmişik” sözləri ilə məsuliyyəti üzərindən atmağa çalışıb.

Bunun üzərinə Əhmədov, Müdafiə Nazirliyinin rəsmi məktubunu gətirərək Heydər Əliyevə təqdim edib. Sənədlə tanış olan Prezident qəzəblənərək nazirlik nümayəndələrinə, “Siz sifariş verdiyinizi gətiriblər, necə utanmırsınız?!” – deyə sərt reaksiya verib.

Oxunub: 445