Rusiya artıq Ukraynanın dörd bölgəsinə tam nəzarət etmək niyyətindən geri çəkilib.

Gündəm24.az xəbər verir ki, bu barədə Türkiyənin xarici işlər naziri Hakan Fidan "TGRT Haber"ə müsahibəsində bildirib.

“Əvvəllər ruslar həmin dörd bölgənin inzibati sərhədlərinin tam ələ keçirilməsini planlaşdırırdılar. İndi isə bu tələbdən imtina ediblər və yalnız bir bölgə istisna olmaqla, təmas xəttində mövqelərini qoruyurlar”, – Fidan deyib.

Nazir xatırladıb ki, Ukrayna ilə Rusiya arasında Türkiyədə keçirilən danışıqların üçüncü raundunda tərəflər ilk dəfə konkret mövqelərini ortaya qoyublar. Onun sözlərinə görə, həmin təkliflər sonradan ABŞ prezidenti Donald Tramp və Rusiya lideri Vladimir Putin arasında Alyaskada keçirilən görüşdə də müzakirə olunub.

Fidan qeyd edib ki, Moskva hazırda bütün Donetsk vilayətini nəzarətə götürməyə çalışır, Zaporojye istiqamətində isə təmas xəttində mövqelərini gücləndirmək niyyətindədir.

“Onların bu şərti irəli sürməsi və təhlükəsizlik mexanizmi ilə təmin ediləcəyi barədə razılığa gəlmələri əslində vacib bir dönüş yaradır. Bu, demək olar ki, dörd ildir davam edən müharibənin bitməsi üçün baza ola bilər. Amma bunun hər iki tərəf, xüsusilə də Ukrayna üçün çətin nəticələri var”, – Fidan vurğulayıb.

Diplomatın sözlərinə görə, Donetskin itirilməsi Ukraynanın qalan ərazilərinin müdafiəsini daha da çətinləşdirəcək. O həmçinin beynəlxalq təhlükəsizlik təminatlarının vəziyyəti sabitləşdirə biləcəyini və gələcək dialoqa zəmin yaradacağını deyib.

Xatırladaq ki, Moskvanın oxşar şərtləri əvvəllər də xarici mediada mənbələrə istinadən yayılsa da, Rusiya rəsmiləri bu məlumatları təsdiqləməyiblər.

Bundan əvvəl “Politico” yazıb ki, Qərb diplomatları və hərbi rəsmilər Ukrayna ilə Rusiya arasında 40 kilometrlik bufer zonasının yaradılması imkanını müzakirə edirlər. Həmin plana əsasən, atəşkəs rejiminə nəzarət üçün bölgəyə sülhməramlı qüvvələrin yerləşdirilməsi də nəzərdən keçirilir.

Mövlam RZALI,
Gündəm24.az

Oxunub: 82