Qidalanma yalnız bədən sağlamlığı üçün deyil, eyni zamanda sinir sistemi üçün də mühüm rol oynayır. Alimlərə görə, bəzi qidalar beyindəki kimyəvi tarazlığı dəyişdirə və əhval-ruhiyyəyə təsir edə bilir. Bəs əsəblərin tez pozulması və gərginlik halları düzgün olmayan qidalanma ilə əlaqəli ola bilərmi? Gün ərzində qəbul etdiyimiz qidalar bizi daha sakit və ya daha əsəbi biri halına gətirə bilərmi?
“Yeni Sabah” bu barədə qida eksperti İlkin Şirinovla danışıb. Ekspert qeyd edib ki, qidaların əsəb sisteminə təsiri ilə bağlı fikirlərə bəzən dırnaqarası yanaşırıq:
“Amma birbaşa olaraq, qidalanmağımız əsəb sisteminə təsir edir. Yəni nə yeyiriksə, ona bənzəyirik. Hazırda bir çox insanın yaşadığı qəbzlik problemi var. Həkimlər bu barədə daha çox məlumatlıdır ki, həmin xəstəlik əsəb sisteminə necə təsir edir. Ona görə də qəbzlik yaradan qidalardan da uzaq durmaq vacibdir. Məsələn, gecə yarısı həddən artıq ət yemək insanda qəbzlik probleminin ortaya çıxmasına səbəb olur”.
Ekspert onu da qeyd edib ki, əsəb sisteminə təsir edənlər arasında birinci sırada dayanan energetik içkilərdir:
“Gündəlik olaraq qəbul edilən energetik içkilər asılılıq yaradır. İnsanlar özlərini psixoloji olaraq, inandırmağa çalışırlar ki, bu içkilər əhvalı yüksəldir. Ancaq heç də elə deyil. Əksinə sinir sisteminə təsir edərək asılılıq yaradırlar.
Karbohidratlar isə beyinə xoşbəxtlik hormonu ötürür. Bu da insanı sakitləşdirməyə kömək edə bilər. Balıq məhsullarının da insan sağlamlığına, sinir sisteminə müsbət təsirləri var. Həmçinin, meyvə-tərəvəzlər də bu sıraya aiddir. Şəkər miqdarının həddən artıq qəbulu da insan sağlamlığına zərər vurmaqla yanaşı əsəb sistemimizi korlaya bilər. Məsələn, kofein az miqdarda qəbul ediləndə insanda enerji yaratsa da, gündəlik istehlakda asılılıq ortaya çıxa bilər.
D vitamini çatışmazlığı isə insanlarda ruh düşkünlüyünə, əhval-ruhiyyənin pozulmasına gətirib çıxara bilər. Həmçinin, şokoladdan istifadə zamanı da diqqətli olmaqda fayda var. Ən bəlalı məsələ isə “fast food”lardır. Bunlardan uzaq dursaq, sinir-stressdən də yaxamızı qurtarmış olarıq.
Bütün bunları nəzərə alaraq, yaxşı olar ki, insanlar qidalandıqları məhsullara diqqət yetirsinlər”.
