Özbəkistan və Azərbaycan arasında münasibətlər regionda tarixi hadisələr fonunda inkişaf edir.

“Gündəmtv.az” xəbər verir ki, bunu Özbəkistan Respublikası Prezidenti yanında Strateji və Regionlararası Tədqiqatlar İnstitutunun direktoru Eldor Aripov "Azərbaycan və Özbəkistan: qarşılıqlı faydalı əməkdaşlığın inkişafının perspektivli istiqamətləri" adlı Azərbaycan-Özbəkistan Ekspert Şurasının ikinci iclası çərçivəsində bildirib.

"Ölkələrimiz qarşısında təkcə ikitərəfli əməkdaşlıq üçün deyil, həm də "Mərkəzi Asiya - Cənubi Qafqaz" formatında regional əlaqələrin aktivləşdirilməsi üçün perspektivlər açılır", - o qeyd edib.

Direktorun sözlərinə görə, Özbəkistan və Azərbaycan bu qarşılıqlı əlaqələrin inkişafına istiqamət verən özünəməxsus lokomotivlərə çevrilə bilər.

"Regionlarımız uzunmüddətli və sıx əlaqələrə malikdir. Böyük şair Əlişir Nəvai Nizami Gəncəvini öz müəllimi hesab edirdi ki, bu da ölkələrimiz arasında dərin mədəni əlaqələrin rəmzidir", - o bildirib.

E.Aripov vurğulayıb ki, Azərbaycan və Özbəkistan arasında münasibətlər yüksələn xətlə inkişaf edir və bu, iki ölkənin liderləri arasında etimada əsaslanan münasibətlər sayəsində mümkün olub.

Onun sözlərinə görə, bu, iqtisadi əməkdaşlığın genişləndirilməsi üçün geniş imkanlar açır.

"Biz üçüncü ölkələrdən idxalı əvəzləmək üçün fəal işləyir, sənaye kooperasiyasını inkişaf etdiririk, bu da iqtisadi qarşılıqlı əlaqələrimizin hərəkətverici qüvvəsi ola bilər", - direktor vurğulayıb.