Qazaxıstan Baş naziri Oljas Bektenov və Türk Dövlətləri Təşkilatının (TDT) Baş katibi Kubanıçbek Ömüralıyev Astanada keçirilən görüşdə ali səviyyədə əldə edilmiş razılaşmaların həyata keçirilməsini, həmçinin üzv ölkələr arasında əməkdaşlığın daha da genişləndirilməsi perspektivlərini müzakirə ediblər.
Bu barədə
Gündəmtv.az Qazaxıstan hökumətinin mətbuat xidmətinə istinadən xəbər verir.
Tərəflər ticari-iqtisadi əməkdaşlığın aktivləşdirilməsinə və qarşılıqlı tədarüklərin nomenklaturasının genişləndirilməsinə diqqət ayırıblar.
"Ötən il Qazaxıstanın TDT-nin üzv dövlətləri ilə ticarət dövriyyəsi 11,4 milyard dollar təşkil edib. Bununla yanaşı, mövcud potensialın cari göstəricilərdən xeyli geniş olduğu qeyd edilib. Bununla əlaqədar Qazaxıstan Prezidenti Kasım-Jomart Tokayev ticarət əlaqələrinin daha da inkişafına yönəlmiş ayrıca sənədin hazırlanması təşəbbüsü ilə çıxış edib. Görüş zamanı humanitar təşəbbüslər də müzakirə olunub", - hökumətin məlumatında bildirilib.
Görüşün yekununda O.Bektenov və K.Ömüralıyev Qazaxıstan və TDT arasında səmərəli və qarşılıqlı faydalı əməkdaşlığın gələcək inkişafına kömək etməyə hazır olduqlarını bildiriblər.
