Laçında keçirilən 28 May Müstəqillik Günü tədbirlərində Türkiyə, Azərbaycan və Pakistan arasındakı strateji ittifaq yenidən vurğulanıb.

“Report”un məlumatına görə, bu barədə Türkiyədə dərc olunan “Star” qəzetində məqalədə qeyd olunub.

Müəllif bu kontekstdə İkinci Qarabağ Müharibəsi zamanı “üç dövlət, tək millət" şüarının formalaşdığını yada salıb:

“Üç dövlət tək millət anlayışı, yalnız ideoloji deyim deyil, eyni zamanda bu üç ölkənin ortaq keçmişi və mədəni bağlarının gələcəyə yönəlmiş konkret bir strateji planla birləşdiyinin göstəricisidir”.

Yazıda hər üç ölkənin çoxlu sayda ortaq cəhətlərinin olduğu vurğulanıb:

“Bunlar bizim potensialımızı müəyyən edir. Birliyimizi formalaşdıran tərəflərimiz Qərb imperializminin son iki əsrdir tətbiq etdiyi ayırma siyasətini tərsinə çevirib. Qərb mərkəzli hakimiyyət anlayışının sarsıldığı bir dövrdə, bu birlik, ağıllı və müstəqillik yönümlü siyasətlərlə daha asan şəkildə güclənə bilər”.

Müəllif qeyd edib ki, Azərbaycan Prezidenti İlham Əliyev Pakistan-Hindistan gərginliyində də hər zaman Pakistanı dəstəkləyən açıqlamalarla çıxış edib:

“Əliyevin də açıqlamalarında vurğuladığı kimi, Azərbaycan təkcə regional deyil, geniş bir coğrafiyada enerji təhlükəsizliyinə töhfə vermək üçün böyük layihələrə imza atır. Beləliklə, üç ölkə arasındakı ittifaq, sadəcə tarixi və mədəni bağlardan qidalanan bir əməkdaşlıq deyil, eyni zamanda strateji bir ortaqlıq olaraq formalaşır”.