"Kofe hər zaman müzakirə olunan qida məsələləri sırasında deyil".

Bu sözləri qida məsələləri üzrə ekspert İlkin Şirinov Hit.az-a açıqlamasında deyib.

O bildirib ki, insanların əksəriyyəti kofe ilə tez-tez maraqlanmır:

"Ona görə də insanların kofe haqqında məlumatı azdır. Ümumiyyətlə, qəhvə toxumları qovrulduqdan sonra üyüdülür və toz halına salınır. Daha sonra ondan kofe kimi istifadə edilir. Əslində, bu hər zaman xeyirli içki də hesab olunmur. Çünki şəkər xəstələri, hamilə xanımlar, ürək-damar çatışmazlığından əziyyət çəkənlər və mədəsində problem olanlara mütəmadi olaraq qəhvə içmək məsləhət görülmür.

Səbəb isə çox sadədir. Qəhvənin tərkibində kofein olduğu üçün ondan tez-tez istifadə ürək döyüntülərinin ritmini poza bilir. Eyni zamanda, qəhvə mədə xorasına səbəb ola, habelə mədədəki hansısa kiçicik yara olan şəkər xəstələrinə müxtəlif təsirlər göstər bilir".

Ekspert kofe alarkən nələrə diqqət etməli olduğumuzdan da danışıb:

"İlk növbədə onun qablaşdırılmasına fikir vermək lazımdır. Qablaşdırması çox primitiv olan, üzərində yararlılıq istifadə müddəti və istehsalçı adı göstərilməyən ucuz kofelərdən istifadə etmək məsləhət deyil. Çünki onların tərkibində sadəcə 15-20 faiz qəhvə tozu bilər. Qalanları isə müxtəlif rəngləndirici, dadlandırıcı və ətirləndirici maddələrdən ibarət olur. Bunlar da insan sağlamlığı üçün olduqca ziyandır. Ona görə də xüsusi şüşə qabda qablaşdırılmış qəhvəni almaq məsləhətlidir".


İlkin Şirinovun sözlərinə görə, ucuz kofe keyfiyyətli ola bilməz:

"Çünki o ucuz istifadə olunan içki növü deyil. Üstəlik, qəhvənin heç bir növü ucuz olmur. Nəzərə almaq lazımdır ki, qəhvənin bəlli bir qiyməti var. Eyni zamanda, 15-20 qəpiyə xüsusi paketlərdə satılan kofelər də olduqca keyfiyyətsizdir.

Həmin qiymətə satıla kofelərin tərkibinin tam keyfiyyətli olması da mümkün deyil. Hətta orada ümumiyyətlə keyfiyyətdən söhbət belə gedə bilməz. Bütün bu səbəblərə görə, kofe alarkən onun qablaşdırılmasına, istehsalçı adına və istifadə müddətinə mütləq diqqət etmək lazımdır".