Bu gün Bakı Ali Neft Məktəbinin kampusunda ABŞ-nin “Society for Science” təşkilatı tərəfindən təşkil olunan Beynəlxalq Elm və Mühəndislik Sərgisi (ISEF) çərçivəsində ölkəmizdə təşkil olunan “Sabahın alimləri” XIV Respublika Layihə Müsabiqəsinin açılış mərasimi keçirilib.
Gündəmtv.Az xəbər verir ki, açılış mərasimində Elm və Təhsil Nazirliyinin rəsmiləri, millət vəkilləri, dövlət və özəl şirkət təmsilçiləri, digər qonaqlar iştirak edir.
Tədbiri giriş sözü ilə açan Təhsil İnstitutunun direktor müavini Fuad Qarayev hesabatla çıxış edib. O bildirib ki, layihələr ümumilikdə 9 sahəni əhatə edir və qaliblər 14 martda elan ediləcək:
"Müsabiqəyə 9-11 sinif şagirdləri qoşulub. "Sabahın alimləri" XIV Respublika Layihə müsabiqəsi 2 mərhələdən ibarətdir. Son mərhələdə münsiflərin yekun qiymətləndirməsi ilə qalib gələn layihə ABŞ-də keçiriləcək "İntel" Elm və Mühəndislik sərgisində iştirak edəcəklər. Müsabiqədə finala 138 layihə qalıb. Bu layihələrdən 110-u kollektiv,
28-i isə fərdi layihələrdir. Finala vəsiqə qazanan layihələrin sayı ötən illə müqayisədə artıb.
Hər istiqamət üzrə 6 layihə qalib elan olunacaq. Ümumilikdə 54 layihə qalib olacaq".
Qeyd edək ki, müsabiqədə IX-XI sinif şagirdləri iştirak edir. Şagirdlər 9 istiqamət (riyaziyyat, fizika və astronomiya, kimya, biologiya, tibb və sağlamlıq, ekologiya və ətraf mühitin idarə olunması, mühəndislik, kompüter elmləri, robototexnika və süni intellekt) üzrə elmi-tədqiqat işləri hazırlayıblar və açılış mərasimində layihələr də sərgi formatında təqdim olunacaq.
