Bakının Xəzər rayonu, Buzovna qəsəbəsində fəaliyyət göstərən dönər və toyuq əti emalı müəssisəsində nöqsanlar aşkarlanıb. Bu barədə Azərbaycan Qida Təhlükəsizliyi Agentliyi məlumat yayıb. Yoxlama zamanı “AL-ASR” əmtəə nişanlı çiy mal əti və toyuq əti dönərindən, çiy toyuq hissələrindən götürülmüş nümunələrin laborator müayinəsi nəticəsində çiy mal əti dönərində at və toyuq DNT-si, çiy toyuq əti dönərində isə salmonella müəyyən edilib.

Bu kimi halların qarşısı necə alına bilər?

Mövzu ilə bağlı Redaktor.az-a danışan qida eksperti İlkin Şirinov bildirdi ki, dönərlə bağlı hər zaman müxtəlif fikirlər səsləndirilir.

"Dönər alarkən insanları ehtiyatlı olmağa çağırırıq. Amma burada yenə də məsuliyyət insanların öz üzərinə düşür. Ümumiyyətlə, dəfələrlə qeyd etmişik ki, dönər insan sağlamlığını riskə atan qidalardan biridir. Ətlərin qeyri-qanuni yolla istifadəsi, dönərxanalarda antisanitar vəziyyət, çalışanların nəzarətsizliyi burada əsas məqamdır. İnsanlarda isə bu, vicdan məsələsidir. Pul qazanmaq üçün insanların sağlamlığını riskə atmaq, mənşəyi məlum olmayan ətdən hazırlanan dönərləri satmaq vicdan işidir. Sahibkarlar pul xatirinə insanların həyatını təhlükəyə atmış olurlar. Bu gün, təəssüf ki, valideynlər həmin dönərlərdən alıb övladlarına verirlər. Birmənalı şəkildə qəbul etməliyik ki, istər mal ətindən, istərsə də toyuq ətindən hazırlansın, dönərin bişirilməsində yarımçiy ətlərin insanlara yedirdilməsi qanun pozuntusu sayıla bilər. Çünki dönərxanalarda ətlər tam bişmir, dönərə vurulan ədviyyatlar isə tozun-torpağın içində olur. Bu gün müşahidə edirik ki, bazar ətraflarında, insanların çox toplaşdığı yerlərdə açıq şəkildə dönər satışı həyata keçirilir. Bunlara göz yummaq düzgün deyil. İctimai qınaq olmalıdır. Mütləq deyil ki, Azərbaycan Qida Təhlükəsizliyi Agentliyinin əməkdaşları gəlib cərimə yazsınlar. İnsanlarımız özləri bu dönərləri almamalıdırlar", - deyə həmsöhbətimiz vurğuladı.
Ekspert bildirdi ki, əgər alış-verişdə azalma olsa, dönər satılmayacağı üçün bu fəaliyyət dayanacaq:

"Lakin biz gözləyirik ki, həmin yerlər cərimələnsin. Məsələn, cərimə yazılır, həmin adama vəziyyət izah edilir, amma o yenə də fəaliyyətini davam etdirir. Əgər biz həmin dönəri almasaq, artıq işin axsamağa başladığını görəcəklər. Hazırlanmış dönərlər qalıb xarab olacaq və nəticədə sahibkar fəaliyyətini dayandıracaq. Dəfələrlə insanları bu dönərlərdən istifadə etməməyə çağırırıq. Təəssüflər olsun ki, yenə də azyaşlıların əlində dönər görürük".]