"Repetitorluğun ləğv olunması anlayışı doğru deyil. Əvvəlcə repetitorluğu yaradan səbəblərə baxaq. Repetitorluğu yaradan səbəb Dövlət İmtahan Mərkəzinin qəbul imtahanlarının ümumtəhsil məktəblərindəki proqramlarla və yaxud da tədris mühiti ilə üst-üstə düşməməsidir. Yəni bu gün repetitor yanına getmədən hər hansı bir abituriyent ali məktəbə qəbul ola bilmir. Bu, məsələnin birinci tərəfidir. İkinci bir tərəfi cəmiyyət olaraq artıq belə başa düşürük ki, nəinki Dövlət İmtahan Mərkəzinin qəbulunda, eləcə də işə qəbul sahələrində repetitorun köməyi olmadan mümkün deyil. Cəmiyyət artıq bunu qəbullanıb".

Bu sözləri Gündəmtv.az-a açıqlamasında təhsil eksperti Elşən Qafarov repetitorluğun ləğv olunub-olunmamasından danışarkən deyib.

Onun fikrincə, məktəbdə öyrədilən bilik-bacarıqlarla Dövlət İmtahan Mərkəzinin qəbul sisteminə düşmək mümkün deyil:

"Repetitorluğun ləğv edilməsində maraqlı olan heç kim yoxdur. Bu gün repetitorların əldə etdiyi nəticələr məktəbin və təhsil sisteminin adına yazılır. Ona görə Elm və Təhsil Nazirliyi, onun idarəetmə qurumları, təhsil müəssisələri özləri repetitorluğun lehinədirlər. Və repetitorluğu ləğv etmək olmaz, çünki bu 1-2 günə yaradılmayıb. Düşünürəm ki, bunu minimuma endirmək mümkündür. Bunu da etmək üçün birinci növbədə Dövlət İmtahan Mərkəzinin qəbul sistemində qrup imtahanını ixtisas imtahanı ilə əvəz etmək olar. Eyni zamanda buraxılış imtahanları ilə qəbul imtahanlarını birləşdirmək olar".

Qeyd edək ki, elm və təhsil naziri Emin Əmrullayev jurnalistlərin suallarını cavablandırarkən deyib ki, repetitorluq mərhələli şəkildə ləğv ediləcək.