"Biz öz yerimizə əvvəl robotları gətirib qoyduq, indi isə süni intellekti. Süni intellekt 1990-cı illərdən dünya çempionlarını udmağa başladı. Sonra məlum oldu ki, insan zəkası süni intellektlə yarışa bilməyəcək. Bəzən fikirləşdilər ki, süni intellekt yaradıcılığa, fəlsəfəyə, incəsənətə girə bilməyəcək. Amma girdi. Necə çıxacağıq bilmirəm".

Gündəmtv.az xəbər verir ki, bu fikirləri filosof Müşfiq Ötgün "Söhbətgah" podkast proqramında səsləndirib.
Onun fikrincə, hazırda proqnoz çox acınacaqlıdır:

"Biz özümüzü planetdə lazımsız etmək üçün əlimizdən gələni etdik. Bəzi məlumatları ictimaiyyətlə bölüşmürlər. Amma Çin, Rusiya, ABŞ və digər ölkələr süni intellekt vasitəsilə mükəmməl silah yaratmaqla məşğuldurlar. Fikirləşirlər ki, o, qətiyyən səhv etməyəcək və düz hədəfi nişan alacaq. Biz bunlardan necə qoruna biləcəyik? Biz özümüzü zəlil gününə qoyduq. Yer üzündəki insanların 98%-i plagiatdır. Düşüncələr, yerişlər, gülüşlər, zövqlər plagiatdır. Onları çox böyük uğurla süni intellekt əvəz edəcək. Artıq süni zəkaya məqalə, dissertasiya, roman, ssenari yazdıracaqlar. Biz elə bil ki, toy etmişik, toy gecəsinə süni intellekti bəy yerinə göndərmişik. Belə bir absurd yerə gəlib çatmışıq. Bizə bu dünya işləmək üçün verilmişdi. Jurnalistlər belə öz məqalələrini, proqramçılar proqramlarını süni zəkaya yazdırırlar. Bununla biz ədalətsiz bir fəza yaratdıq. Ona görə həll olunması çox çətin məsələdir. Bəlkə də, biz sonun əvvəlindəyik".