Bakı-Tbilisi-Buxarest-Budapeşt birgə "yaşıl enerji" enerji şirkəti yaradılıb.
Gündəmtv.Az xəbər verir ki, Azərbaycan, Gürcüstan, Macarıstan və Rumıniyanın elektrik şəbəkələri operatorları Azərbaycandan Gürcüstan və Qara dəniz vasitəsilə Rumıniyaya yüksək gərginlikli elektrik kabelinin çəkilməsi üçün birgə müəssisə yaradıblar.
Bu məqsədlə Buxarestdə yaradılan "Green Energy Corridor Power Company" - GECO POWER COMPANY birgə müəssisəsinin qeydiyyatı prosesi uğurla başa çatıb.
Təsisçilər “Azərenerji” Səhmdar Cəmiyyəti, Gürcüstanın Dövlət Elektrik Sistemləri Səhmdar Cəmiyyəti, Macarıstanın özəl enerji şirkəti MVM Məhdud Məsuliyyətli Cəmiyyəti və Rumıniyanın “Transelectrica” milli elektrik şəbəkəsi şirkətləridir. Birgə müəssisə bərabər əsaslarla yaradılır, ona görə də bütün maraqlı tərəflər şirkətin idarə edilməsində bərabər şəkildə iştirak edəcəklər.
Hazırkı mərhələdə birgə müəssisə “Yaşıl enerji dəhlizi” çərçivəsində tədqiqat və layihələndirmə işləri ilə məşğul olacaq ki, bu da digər məsələlərlə yanaşı, Qara dənizdə yüksək gərginlikli sualtı elektrik ötürücü kabelinin tikintisini nəzərdə tutur.
Strateji Tərəfdaşlıq Sazişi və Yaşıl Enerji Sahəsində Əməkdaşlıq Memorandumu ilə müəyyən edilmiş məqsədlərin həyata keçirilməsi məqsədilə 25 iyul 2023-cü ildə Azərbaycan, Gürcüstan, Rumıniya və Macarıstan hökumətləri arasında birgə müəssisənin yaradılmasına dair Anlaşma Memorandumu imzalanıb və burada birgə müəssisənin yaradılmasının ümumi prinsipləri müəyyən edilib.
Agentliyin məlumatına görə, sualtı kabel layihəsi milli və regional enerji təhlükəsizliyinin möhkəmləndirilməsinə, Qara dənizin kommunikasiya imkanlarının artırılmasına, enerji mənbələrinin şaxələndirilməsinə, bərpa olunan enerji istehsalı potensialından istifadəyə və enerji balansında bərpa olunan enerjinin payının artırılmasına töhfə verir.
