Fabrik məhsullarının və hazır qidaların istehlakı infarkt, insult və Parkinson xəstəliyindən ölüm riskini artırır.

Gündəmtv.Az xəbər verir ki, bununla bağlı tədqiqatların nəticələri "The Lancet Regional Health - Europe" jurnalında dərc olunub.

Araşdırmada 35-74 yaş arasında olan 400 min insan iştirak edib. Alimlər diqqəti iştirakçıların pəhrizlərini və istehlak etdikləri ultra-işlənmiş qidaların miqdarını təhlil etməyə yönəldiblər. Bu kateqoriyaya hazırlanmış yeməklər, fəstfud, qəlyanaltılar və şəkərli içkilər daxil edilib.

16 illik araşdırma göstərib ki, hazır qidaların tərkibində yağ, şəkər və əlavə maddələrlə zəngin olduğundan bu məhsulları daha çox istifadə edənlərdə Parkinson xəstəliyindən ölmə ehtimalı 25% daha çoxdur. Zərərli yemək yeyənlərin insult və ya infarktdan sağ qalma ehtimalı da təxminən 10% az idi.

Bundan əlavə, araşdırma zamanı çoxlu miqdarda ultra-emal olunmuş qida qəbulu ümumi vaxtından əvvəl ölüm riskini 4% artırdığı aşkar edilib.

Alimlər izah ediblər ki, hazırlanmış qidalar, fəstfud, mağazada satın alınan tortlar, peçenye və kolbasa, adətən, sənaye emalının bir neçə mərhələsindən keçir. Bu da öz növbəsində qida xammalının ilkin fiziki strukturunu dəyişdirir və belə məhsulların orqanizm tərəfindən sorulma sürətini artırır.

Onları istehlak etmək qan şəkərinin səviyyəsini yüksəldir, effektiv şəkildə toxluğa nail olmağınıza mane olur və sizi sağlam saxlamağa kömək edən “dost” bakteriyalar icması olan bağırsaq mikrobiomunuza zərər verir.

Dadlandırıcılar, dəyişdirilmiş nişastalar, qatılaşdırıcılar və emulqatorlar kimi pəhriz əlavələri də infarkt və insult riskini artıra bilən bağırsaq iltihabı və hormonal reaksiyalarla əlaqələndirilib.