2 aprel 2025-ci il tarixində Azərbaycanda rəsmi səfərdə olan Almaniya Federativ Respublikasının Prezidenti Frank-Valter Ştaynmayer və xanımı Elke Büdenbender Şəhidlər xiyabanını ziyarət ediblər. Prezident Frank-Valter Ştaynmayer Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının xatirəsini ehtiramla yad edib, “Əbədi məşəl” abidəsinin önünə əklil qoyub. Bakının ən hündür nöqtəsindən paytaxtımızın mənzərəsini seyr edən ali qonağa və xanımına Şəhidlər xiyabanının tarixi və şəhərdə görülən abadlıq-quruculuq işləri barədə məlumat verilib. Azərbaycan Prezidenti İlham Əliyevin Almaniya Prezidenti Frank-Valter Ştaynmayerlə təkbətək görüşü olub. Görüşdən sonra prezidentlər mətbuat qarşısında bəyanatla çıxış ediblər. Azərbaycanla Ermənistan arasında aparılan "Sülh müqaviləsi" ilə bağlı vəziyyətə toxunan Azərbaycan Prezidenti İlham Əliyev deyib ki : " Bu günə qədər 17 paraqrafdan ibarət olan müqavilənin mətni razılaşdırılıb. Azərbaycan burada hər hansı bir əlavə şərt irəli sürmür. Bizim şərtlərimiz Ermənistan üçün bəllidir, yenilik deyil. Bu şərtləri biz uzun müddət ərzində irəli sürürük. Ancaq Ermənistandan bu günə qədər hər hansı bir ciddi cavab almamışıq. Bizim əsas iki tələbimiz Ermənistan tərəfindən yerinə yetirilməyib.

- Birinci, ATƏT-in Minsk qrupu ləğv edilməlidir.

- İkinci, Ermənistan konstitusiyasında Ermənistan müstəqillik aktına istinad var. Orada

Azərbaycanın hüquqi, tarixi ərazisi Ermənistanla birləşməsi haqqında müddəa var. Bu, bizə qarşı açıq ərazi iddiası sayılır. Ona görə Ermənistan konstitusiyasından bu bəndin çıxarılması bizim legitim tələbimizdir. Bu iki şərt təmin olunandan sonra sülh müqaviləsini imzalanmaq üçün heç bir maneə olmayacaq. İndi Ermənistan öz mövqeyini bildirməlidir. Əgər Ermənistan doğurdan da sülh müqaviləsini imzalamaq istəyirsə, Azərbaycanın bu iki legitim şərtini qəbul etməlidir”.

Almaniya Federativ Respublikasının Prezidenti Frank - Valter Ştaynmayer Azərbaycan Respublikasının Prezidenti İlham Əliyevlə mətbuata birgə bəyanatında bildirib ki : "Almaniya Azərbaycanla Ermənistan arasında davam edən münaqişənin həssas məqamlarına diqqətlə yanaşıb. Biz məsələlərə beynəlxalq hüquq normalarına uyğun münasibət bildirmişik. Biz Qarabağın Azərbaycan ərazisi olduğunu bilirik və tanıyırıq”. Almaniya prezidenti daha sonra bildirib ki : "2022-ci ildə Rusiya qazının təchizatında fasilələr yarandığı zaman Azərbaycan Almaniyanı lazımi həcmdə qazla təmin etmək öhdəliyini üzərinə götürüb. Ölkələrimiz arasındakı münasibətlərin tarixinə baxsaq görərik ki, alman şərabçıları kənd təsərrüfatının bu sahəsinin inkişafında Azərbaycana əhəmiyyətli dərəcədə töhfə verib. Almaniya şirkətləri neft hasilatında və enerji sisteminin yaradılmasında fəal iştirak edib.

Azərbaycanda çoxlu sayda alman yaşayıb. Tarixi əlaqələr ölkələr arasındakı mövcud münasibətləri anlamaq üçün çox vacibdir. Azərbaycanda alman dilinin öyrənilməsinə və Almaniyada təhsilə böyük maraq var. Biz təhsil və elm sahələrində əməkdaşlığımızı genişləndirməliyik. Qarşılıqlı iqtisadi əlaqələrin perspektivlərini və hər iki ölkənin beynəlxalq hüquq normalarına sadiqliyini qorumalıyıq."

Qəvami Sadıqbəyli, "HƏP" sədrinin siyasi məsələlər üzrə müşaviri;