Şanxay Əməkdaşlıq Təşkilatının Çində keçirilən sammiti çərçivəsində Azərbaycan Prezidenti İlham Əliyev və Birinci vitse-prezident Mehriban Əliyeva ilə Ermənistanın baş naziri Nikol Paşinyan və həyat yoldaşı Anna Akopyan arasında ayaqüstü söhbət baş tutub. Tərəflərin bu təması Vaşinqtonda keçirilmiş son görüşdən sonra sülh gündəliyindəki irəliləyişlərin davamı kimi dəyərləndirilir.

gundemtv.az xəbər verir ki, politoloq Asif Nərimanlı qeyd edib ki, anti-sülh gündəliyini körükləyəcək fors-major situasiyalar yaşanmasa, bu cür mənzərələrin gələcəkdə daha çox şahidi olmaq mümkündür.

Politoloq həmçinin qeyd edib ki, əsas diqqət çəkən məqam Mehriban Əliyeva ilə Anna Akopyanın ilk dəfə üz-üzə gəlməsidir. Onun sözlərinə görə, bu görüş Akopyanın illər öncə səsləndirdiyi bəyanatları fonunda xüsusi maraq doğurur.

Xatırladaq ki, 2019-cu ildə – müharibədən öncə Anna Akopyan Mehriban Əliyevanı Qarabağa dəvət etmiş, Şuşada muğam dinləməyi və çay içməyi təklif etmişdi. Politoloq qeyd edib ki, bu, işğalçı tərəfin Azərbaycana yönəlik açıq ironiyası idi. 44 günlük müharibədən sonra isə Mehriban Əliyeva bu ironiyaya cavabı Şuşada – Cıdır düzündə çay süfrəsi arxasında və muğam sədaları altında verdi.

Nərimanlı əlavə edib ki, beş il sonra baş tutan sammitdəki görüşün fotosu da diqqətdən yayınmayıb – Paşinyan və Akopyanın Əliyev və Əliyeva qarşısındakı duruşu hər şeyi ifadə edir.

Əli Səfərli,
gundemtv.az

Oxunub: 267