Özbəkistanda Azərbaycan telekanallarını həm striminq xidmətlərində, həm də kabel televiziyası vasitəsilə izləmək mümkündür və onların sayı onlayn məkanda əhəmiyyətli dərəcədə artıb.

“Gündəmtv.az”ın Daşkənddə ezam olunmuş əməkdaşının məlumatına görə, bunu Özbəkistan Respublikası Prezidenti Administrasiyası yanında İnformasiya və Kütləvi Kommunikasiyalar Agentliyinin birinci direktor müavini Dilşod Saidjanov Azərbaycan KİV nümayəndələri və bir sıra dövlət qurumlarının mətbuat xidmətlərinin rəhbərləri ilə görüşdə bildirib.

O bildirib ki, bu istiqaməti perspektivli hesab edirlər: “Əminik ki, onu aktiv şəkildə inkişaf etdirmək lazımdır”.

D.Saidjanov, həmçinin vurğulayıb ki, Özbəkistan Azərbaycan auditoriyasının ölkə, onun mədəniyyəti və müasir reallıqları haqqında daha çox məlumat əldə etməsində maraqlıdır.

Onun sözlərinə görə, mediakontent vasitəsilə mədəni mübadilə xalqlar arasında qarşılıqlı anlaşmanın gücləndirilməsinə kömək edir: "Özbək seriallarının Azərbaycanda populyarlığı göstərir ki, cəmiyyətimizi narahat edən mövzular qismən sizdə də əks-səda doğurur. Biz seriallarımızın nə qədər dramatik və ya komik olduğunu anlayırıq və məhz belə mədəni mübadilə, kommunikasiyalar vasitəsilə xalqların qarşılıqlı əlaqəsi baş verir. Bu, xalq diplomatiyasının elementidir".

D.Saidjanov, həmçinin azərbaycanlı həmkarları ilə qarşılıqlı səfərlərin sayının artırılmasının vacibliyini qeyd edib.

O vurğulayıb ki, Özbəkistanda ziyarət üçün maraqlı yerlər çoxdur:

"Azərbaycana daha tez-tez səfər etmək istəyirik. Şamaxı, Şəki, Lahıc, şimal rayonlarını ziyarət etmək və öyrənmək lazımdır. Yeni məkanları tanımaq bizim üçün maraqlı olardı, çünki bu, həm də ikitərəfli turizmin inkişafına kömək edir və iki ölkə arasında mədəni əlaqələri dərinləşdirir".