"Bu əhəmiyyətli panel müzakirəsinin məqsədi keçmişin mirasını anmaqla kifayətlənməyərək gələcək üçün də atılacaq addımların rəmzidir".
Gündəmtv.az APA-ya istinadən xəbər verir ki, bunu Türkiyənin Azərbaycandakı səfiri Birol Akgün Türkiyə Prezident Administrasiyasının Kommunikasiya İdarəsinin təşkilatçılığı ilə Türkçülük Günü münasibətilə Bakıda təşkil olunan “Dildə, Fikirdə, Əməldə Birlik: Türk Dünyasının Gələcəyi’’ adlı panel iclasında deyib.
"Bu günün intellektual zümrəsi olaraq biz gələcəyimizi yeni dövrün tələblərinə uyğun olaraq qurmalıyıq. 2021-ci ildə Türk Dövlətləri Təşkilatının fəaliyyətə başlaması mühüm bir addımdır. Bu təşkilat sadəcə regional deyil, qlobal əhəmiyyətə malik olan bir təşkilatdır. Biz bu təşkilat vasitəsilə iqtisadi, texnoloji və mədəni əlaqələrimizi möhkəmlədirməyə, regional inteqrasiyanı dərinləşdirməyə və mövcud problemlərin ortaq həll yollarını axtarmağa qərarlıyıq. Biz, xüsusilə, təhsil, media, mədəniyyət və digər strateji sahələrdə əlaqələrimizi genişləndirməkdə maraqlıyıq. Ortaq televiziya və radio yayımları, musiqi və incəsənət festivalları bu yolda bizim üçün mayak rolunu oynaya bilər. Xüsusilə də, geosiyasi risklərin artdığı bir dövrdə Türk dünyası öz fəaliyyət dinamikasını gücləndirərək, kənar təsirlərlə mübarizədə daha effektiv bir platformaya çevrilməlidir. Türk dünyasının bir-birinə yaxın olması BMT-nin üç əsas prinsipinə də tamamilə uyğundur. Digər dövlətlər öz maraqları naminə öz mənfəətlərini beynəlxalq hüquqa zidd üsullarla əldə etməyə çalışır. Növbəti ildə 1926-cı ildə Bakıda keçirilən Türkoloji Qurultayın 100-cü ildönümü qeyd olunacaq", - o qeyd edib.
