Heyvanların davranışlarındakı dəyişikliklər həqiqətən zəlzələdən xəbər verə bilərmi?

Bu sual həmişə insanlarda maraq doğurub. Mövzu ilə bağlı Gündəm24.az-a danışan zoomütəxəssis Samir Məmmədov diqqətçəkən fikirlər səsləndirib.

Onun sözlərinə görə, bəli, bəzi heyvanlar zəlzələdən əvvəl yeraltı təkanları çox yaxşı hiss edə bilir:

“Bu, bütün heyvanlara şamil edilə bilməz, amma müəyyən növlərdə belə xüsusiyyət var. Onların orqanizminin özünümüdafiə sistemi və hisslərinin daha həssas olması ilə bağlıdır. Həşəratlar, quşlar, itlər, pişiklər, sürünənlər və digər canlılar bunu fərqli şəkildə hiss edə bilirlər.

Ancaq onu da qeyd etməliyəm ki, bu hal yalnız 10 heyvandan təxminən 1–2-də müşahidə olunur. Onlar narahatlıq keçirir, çünki qorxaraq özlərini xilas etməyə çalışırlar. Yəni məqsədləri insanlara xəbərdarlıq etmək deyil, sadəcə instinktiv olaraq öz təhlükəsizliklərini təmin etməkdir”.

Mütəxəssis bunu gündəlik həyatdan bir nümunə ilə müqayisə edib:

“Bayramlarda fişəng atmazdan əvvəl, təxminən yarım saat öncə bir çox heyvan qaçır, digərləri isə fişəng atıldıqda səsdən qorxub gizlənirlər. Bu, onların orqanizminin özünümüdafiə mexanizmidir. Zəlzələdən əvvəl də eyni hal baş verir – heyvanlar təhlükəni hiss edib daha etibarlı yerə sığınırlar”.

Samir Məmmədovun sözlərinə görə, heyvanların bu davranışı təbii instinkt və qorxu ilə bağlıdır, insanlar üçün şüurlu xəbərdarlıq xarakteri daşımır.

Əli Səfərli,
gundemtv.az

Oxunub: 91