“Növbəti dəfə dünyanın nəbzi Azərbaycanda döyüldü. Prezident İlham Əliyevin dünyamızı narahat edən məsələlərlə bağlı verdiyi mesajlar bütün dünya gündəmini zəbt etdi”.
Gündəmtv.Az xəbər verir ki, bunu deputat Ceyhun Məmmədov parlamentdə çıxışında Prezident İlham Əliyevin ADA-da “Yeni Dünya Nizamına Doğru” mövzusunda çıxışı ilə bağlı mövqeyini açıqlayarkən deyib.
Onun sözlərinə görə, Prezident İlham Əliyev növbəti dəfə həm bölgəmiz həm də dünyamız üçün çox mühüm mesajlar verdi. “Prezident İlham Əliyevin verdiyi mühüm mesajlar çox idi. Bu mesajlar olduqca açıq, cəsur, ünvanlı və hədəfli idi”,- o qeyd edib.
Deputat onların bir neçəsinin üzərində durub: “Onlardan biri yaxın Şərqlə bağlı məsələlər idi. Bu gün Azərbaycan Prezident İlham Əliyevin həyata keçirdiyi uğurlu xarici siyasət nəticəsində Yaxın Şərqdə əsas aktorlarından birinə çevrilib.
Bu gün Yaxın Şərqdə baş verən hadisələr bütün müsəlman dünyası tərəfindən diqqətlə izlənir. Bu baxımdan Türkiyə ilə İsrailin Suriya ilə bağlı məsələləri müazkirə etmək üçün Azərbaycanı seçmələri Prezident İlham Əliyevin həyata keçirdiyi uğurlu və müdrik siyasətin göstəricisidir. Son proseslər bir daha göstərdi ki, Azərbaycan çox haqlı olaraq İsraillə münasibətlərin təməlini zamanında qoyaraq uğurla inkişaf etdirdi.
Bu baxımdan hazırkı dönəmdə Azərbaycanın həm Türkiyə ilə, həm də İsraillə münasibətləri inkişaf etdirməsi xüsusi əhəmiyyətə malikdir.
Burada ən önəmli məsələlərdən biri də Azərbaycanın türk Respublikaları ilə əlaqələrinə verdiyi önəmdir. Azərbaycan bu prosesin irəli aparmasında əsas lokomotiv rollardan birini oynayır. Azərbaycan Şimali Kipr Respublikasının türk dövlətlərinə inteqrasiyası, Türk Dövlətləri Təşkilatı çərçivəsində məşvərətçi status almasında mühüm rol oynayıb. Bu prosesdə təbii ki, Azərbaycanın həyata keçirdiyi müstəqil siyasət çox böyük rol oynayır”.
