Almaniyanın “Porsche” avtomobil şirkəti rəsmi açıqlama yayaraq, elektromobillərə keçidin yanlış olduğunu və benzinlə işləyən mühərriklərə qayıtdığını bəyan edib. Şirkət bildirib ki, daxiliyanma mühərriklərinin yeni modellərinin yaradılmasına 800 milyon avro sərmayə qoymaq fikrindədir. “Ford”, “General Motors”, “Volkswagen” və “Volvo” şirkətləri də eyni mövqedən çıxış edirlər.

Maraqlıdır, bu, elektromobillərə keçiddə geri dönüş yarada bilərmi? Azərbaycanın avtomobil bazarında bu tendensiya necə əks olunacaq?

Mövzu ilə bağlı Ölkə.az-a danışan nəqliyyat eksperti Elməddin Muradlı bildirib ki, Azərbaycanda bu tendensiya hazırda yüksək templə davam edir:

"Eyni zamanda bu məsələ ilə əlaqədar olaraq ölkə rəhbərinin tapşırığı, dövlət proqramı var. Artıq müəyyən işlər görülüb. Davamlı işlər də olmalıdır. Sadəcə olaraq dünyanın bir çox aparıcı ölkələri bu mövzuda Amerika Birləşmiş Ştatlarının prezidenti Donald Trampın çıxışına kökləndilər. O, öz çıxışında iqlim dəyişiklikləri ilə bağlı Amerikanın dəstəyindən yayınaraq bu sahəyə pul ayırmayacağını bildirdi. Bütün təbii sərvətlərdən istifadə edəcəyini qeyd edib. Bu yöndə işbazlar öz ənənələrinə qayıdır. Burada əsas avtomobil istehsalçılarıdır. Çünki dünyada istehsal olunan yanacağın 60 faizini məhz avtomobillər istehlak edir.

Bu baxımdan avtomobil istehsalçılarının belə çıxışı bir növ elə Donald Trampa dəstək idi. Bəli, dünyada müxtəlif tendensiyalar var, elektrik avtomobillərlə bağlı müəyyən mənfi çalarlar var. İnsanlar fikirləşir ki, gələcəkdə bunların batareyalarının utilizasiyası illər ərzində bir avtomobilin yanacağının ətraf-mühitə atdığı zəhərdən daha ağır fəsad verəcək. Bu məsələlər bir az düşündürür, insanları narahat edir. Ona görə dünya özü tam yekdil qərar qəbul edə bilmir ki, elektrik avtomobillərə keçsin, ya keçməsin".