Mina partlayışından sağ çıxan Emin Məmmədov hadisə barədə danışdı - TƏFƏRRÜATLAR/FOTOLAR
Məlum olduğu kimi, iyunun 4-də Kəlbəcərin Susuzluq kəndi ərazisində minaya düşərək yaralanan AzTV-nin rejissoru Emin Məmmədov xəstəxanadan evə buraxılıb.
Gündəmtv.az xəbər verir ki, E.Məmmədov bu gün xidməti vəzifəsini yerinə yetirərkən şəhid olan həmkarı Sirac Abışovun məzarını ziyarət edib və ailə üzvləri ilə görüşüb. E.Məmmədov hadisənin təfərrüatları barədə bunları bildirib: “Həmin gün maşınımız xarab olduğu üçün çəkilişə getməməliydik. Sonra “KamAZ” markalı sərnişin avtomobili ilə yola düşdük. Üçümüz qabaqda, dörd nəfər isə arxada oturmuşduq. Heç vaxt ağlımıza gəlməzdi ki, yolda tank əleyhinə mina basdırıla bilər. Anidən partlayış baş verdi və maşının arxası darmadağın oldu. Sürücü, digər yoldaşım və mən salamat idik və tez maşından düşüb arxadakı yoldaşlarımıza kömək etmək istədik. Amma Sirac və Məhərrəm maşının arxasında yox idilər. Partlayışın birinci zərbəsi onları meşəyə tərəf atmışdı. Biz maşının benzin bakı partlamamış bir nəfər yoldaşımızı oradan çıxara bildik. Məhərrəm və Siracı isə sonradan tələf olmuş halda tapdıq. Məhərrəm təkərin üstü tərəfdə oturduğu üçün zərbə onu çox parçalamışdı. Çox dəhşətli mənzərə yaşadıq. Bir neçə dəqiqə öncə yeyib-içdiyimiz, deyib-güldüyümüz dostlarımız böyük faciənin qurbanı oldular.
Qeyd edək ki, Emin Məmmədov Abışovlar ailəsini ziyarət zamanı şəhid operator Sirac Abışovun şəxsi əşyalarını da özü ilə gətirərək təhvil verib.
Allah fədakar həmkarlarımıza rəhmət eləsin!
0 şərh:
Səndə öz fikrini bizimlə bölüş