2025-ci il fevralın 4-də Səudiyyə Ərəbistanı Krallığının Kral Salman adına Beynəlxalq Ərəb dili Akademiyasının baş direktoru Dr.Abdullah Əl Vaşminin rəhbərlik etdiyi nümayəndə heyəti Azərbaycana rəsmi ziyarət çərçivəsində Bakı Avrasiya Universitetində (BAAU) olub.
Gündəmtv.Az xəbər verir ki, BAAU-nun rəhbərliyi ilə nümayəndə heyəti arasında görüş keçirilib. Görüş zamanı universitetdə fəaliyyət göstərən Ərəbşünaslıq Mərkəzinin uğurları və gələcək əməkdaşlıq imkanları müzakirə edilib.
BAAU-nun rektoru, dosent Səyavuş Qasımov çıxışında 2019-cu ildə imzalanmış müqavilə çərçivəsində layihənin birinci mərhələsinin uğurla başa çatdığını və 2022-ci ildən etibarən ikinci mərhələyə start verildiyini bildirib. O, Mərkəzin fəaliyyətinin yalnız BAAU ilə məhdudlaşmadığını, geniş və çoxşaxəli istiqamətləri əhatə etdiyini vurğulayaraq, ərəb dilinin öyrədilməsi və təbliği sahəsində görülən işlər barədə məlumat verib.
Abdullah Əl Vaşmi çıxışı zamanı Kral Salman adına Beynəlxalq Ərəb dili Akademiyasının dünyada ərəb dilinin təbliği və tədqiqində mühüm rol oynadığını vurğulayıb. O, Azərbaycanda yaradılan Ərəbşünaslıq Mərkəzinin xüsusi əhəmiyyət daşıdığını qeyd edərək bunun Akademiyanın dünyada ilk və yeganə filialı olduğunu bildirib. Abdullah Əl Vaşmi həmçinin mərkəzin fəaliyyətinin ərəb dili və mədəniyyətinin Azərbaycan və region ölkələrində yayılmasına əvəzolunmaz töhfə verdiyini diqqətə çatdırıb:
"Mənim üçün çox xoşdur ki, bu gün Bakı Avrasiya Universitetində Ərəbşünaslıq Mərkəzində iştirak edirəm. Mərkəz artıq bir neçə ildir fəaliyyət göstərir və Səudiyyə Ərəbistanında olan qurumlarla birlikdə bu qardaş ölkədə ərəb dilinin yayılmasına öz töhfəsini verir. Mərkəzdə Səudiyyə Ərəbistanından və Azərbaycandan olan işçi qrupları ərəb dilinin düzgün şəkildə cəmiyyətə çatdırılması üçün müəyyən proqramlardan istifadə edirlər.
Həmişə deyirəm ki, ərəb dili 400-500 yaşı olan bir dil deyil. Bu dil min illərin dilidir. Tək ərəblər yox, dünya müsəlmanları da bu dilə maraq göstərirlər", - deyə o əlavə edib.
Sonra BAAU-nun Ərəbşünaslıq Mərkəzinin rəhbəri Ülviyyə Hüseynova mərkəzin fəaliyyəti barədə geniş təqdimatla çıxış edib. Təqdimat zamanı mərkəzin yarandığı gündən etibarən həyata keçirdiyi beynəlxalq konfranslar, seminarlar, tələbə mübadilə proqramları və ərəb dili üzrə təlimlər haqqında məlumat verilib.
Ü.Hüseynova çıxışında Ərəbşünaslıq Mərkəzinin yalnız təhsil sahəsində deyil, həm də ərəb mədəniyyəti və ədəbiyyatının Azərbaycanda təbliği baxımından mühüm platforma rolunu oynadığını vurğulayıb. O, indiyədək keçirilən tədbir və layihələrin ərəb dili ilə maraqlanan gənclər üçün yeni imkanlar yaratdığını qeyd edib.
"Biz qardaş ölkə Səudiyyə Ərəbistanı Krallığından olan dostlarımız və xüsusilə də Kral Salman adına Beynəlxalq Ərəb dili Akademiyasının bizə göstərdiyi böyük dəstək nəticəsində 2019-cu ildə BAU-da Ərəbşünaslıq Mərkəzini təsis edə bildik. Mərkəzin ilk hədəfi Səudiyyə Ərəbistanı və Azərbaycan arasında xüusilə də elm və mədəniyyət sahəsində ikitərəfli əlaqələrin inkişaf etdirilməsidir. Fəaliyyət göstərdiyimiz 6 il ərzində bu nəticələri yavaş-yavaş görməyə başlayırıq".
Ü.Hüseynova həmçinin əlavə edib ki, hədəflər arasında ərəb dilindən Azərbaycan dilinə və əksinə tərcümələrin inkişaf etdirilməsi də var.
Qeyd edilib ki, mərkəzin fəaliyyət göstərdiyi 6 il ərzində burada təhsil alan tələbələrin sayı 80-dən 130-a çatıb və onların sayının 200-ə çatdırılması əsas məqsədlərdən biridir.
Mərkəz rəhbəri bu tələbələrin BAAU ilə yanaşı BDU, ADA, ADU VƏ AİU-dan olduğunu diqqətə çatdırıb. Onun sözlərinə görə, mərkəz hər il Azərbaycanda 15-20 tələbənin illik təhsil haqqını ödəyir.
Ü.Hüseynova deyib ki, Ərəbşünaslıq Mərkəzi qarşıdakı illərdə də bir sıra yeni layihələr həyata keçirməyi planlaşdırır:
"Ötən il mərkəzdə turizm üzrə dərslər keçirilib. Növbəti illərdə 4 sahə üzrə - diplomatiya, KİV, turizm və idarəetmə sahəsi üzrə ödənişsiz əsaslarla ərəb dili dərsləri keçiriləcək.
Bu ildən etibarən dövlət müəssisələrində işləyən əməkdaşların və həmçinin Azərbaycanda təhsil alan əcnəbi tələbələrin də mərkəzin dərslərinə cəlb edilməsi nəzərdə tutulur.
Artıq dövlət idarə və müəssisələrinin əməkdaşlarına ödənişsiz əsaslarla ərəb dilinin öyrədilməsi üçün bir neçə nazirlik və qurumlara məktub göndərilib".
Həmçinin qeyd edilib ki, ilk dəfə bu ildən etibarən Azərbaycanda IELTS-ə bənzər Ərəb dili üzrə Test Mərkəzi yaradılacaq. Bu mərkəz ərəb dili biliklərinin beynəlxalq sertifikatlaşdırılmasında mühüm addım olacaq.
Təqdimatdan sonra nümayəndə heyəti və universitet rəhbərliyi tərəfindən Ərəbşünaslıq Mərkəzinin təşkil etdiyi rəsm sərgisinə baxış keçirilib. Sərgidə Azərbaycan ziyalıları və abidələrinə aid rəsmlər nümayiş etdirilib və iştirakçılar tərəfindən maraqla qarşılanıb.
Tədbir Ərəbşünaslıq Mərkəzi tərəfindən təşkil olunan ərəb dilində şeir müsabiqəsi ilə davam edib. Məktəbli və tələbələrin iştirakı ilə keçirilən müsabiqədə ərəb dilində şeirlər səsləndirilib. Müsabiqənin qalibləri rektor S.Qasımov və baş direktor Abdullah Əl Vaşmi tərəfindən mükafatlandırılıb.
Tədbirin sonunda BAAU-nun Ərəbşünaslıq Mərkəzinin fəaliyyətinin davam etdirilməsi, yeni əməkdaşlıq istiqamətləri barədə yeni müqavilənin imzalanması ilə bağlı razılıq əldə edilib.
