Bakıda Çindən avtomobil sifariş edən vətəndaşlar problemlə üzləşib.

Gündəmtv.Az xəbər verir ki, bir qrup adam avtomobillərin vəd olunan vaxtda Bakıya gətirilmədiyini iddia edərək, vasitəçi Sənan Əsədzadəni hüquq-mühafizə orqanlarına şikayət edib.

S.Əsədzadə isə sosial şəbəkələrdə barəsində yazılan ittihamlara cavab verib:

"Bu gün biz ölkənin gündəmini zəbt etmişik. Biz bununla tam olaraq razıyıq ki, əgər hansısa nöqsanımız varsa, təbii ki, cəzasız qalmamalıdır. Amma sizə əminliklə deyirəm ki, elə hallar hər zaman olub və yenə minlərlə qınaq, minlərlə şərh yazanlar olur.

9 ilə yaxındır bu sektorda fəaliyyət göstərirəm. 9 ildir ki, yaranan hansısa kiçik bir problemdə qınaq obyekti oluruq. 2-3 ay bundan əvvəl Rusiyada avtomobillərimiz saxlandığı zaman insanların hamısında bu düşüncə var idi. Fikirləşirdilər ki, Sənan Əsədzadə bütün pulları yığdı və yoxa çıxdı. Halbuki Rusiyada maşınların yanında bir-bir barkodları çəkib göndərirdik ki, baxın, sizin avtomobilləriniz buradadır. O problemləri də həll etdik, bütün avtomobilləri gətirdik.

Bəziləri deyir ki, biz illərdir ondan pulumuzu ala bilmirik. Necə pulunu ala bilmirsən? Biz dövlət qurumlarından necə qaça bilərik?! Azərbaycanda fəaliyyət göstərən nə qədər güc strukturları var. Biz onlardan necə yayına bilərik?!

Bildirmək istəyirəm ki, nə zaman problem yaransa, biz həll edəcəyik", - deyə o söyləyib.